Бағдадта йәнә партлитиш вәқәси йүз бәрди


2004-09-17
Share

Ирақ пайтәхти бағдадта җүмә күни өзини өлтүрүвелиш характерлик партлаш вәқәси йүз бәрди. Британийә радио- телевизийә ширкити б б с, партлаш вәқәси аз дегәндә бәш адәмниң җениға замин болғанлиқини хәвәр қилди.

Ройтерс ахбарат агентлиқи ирақ даирилириниң мәлуматини нәқил кәлтүрүп, вәқәдә 13 адәмниң өлгәнликини илгири сүргән. Партлаш бағдад шәһәр мәркизидики бир ават кочида йүз бәргән, өзини өлтүрүвелиш характерлик һуҗум шәһәр мәркизидики рәшид кочисида бир сақчи машинисини нишанға алған. Вәқәдин сәл илгири америка қисимлири билән ирақ қаршилиқ көрситиш күчлири арисида рәшид кочисиниң йенидики һайфа мәһәллисидә қаттиқ тоқунуш болған иди. Бу ирақ сақчи қисимлириниң мушу бир һәптә ичидә 3 - қетим чоң көләмдики һуҗумға учриши болуп һесаблиниду.

Буниң алдида сәйшәнбә күни йүз бәргән бағдадтики партлаш вәқәсидә 47 адәм өлгән, бақубадики ирақ сақчилириға қаритилған һуҗумда 10 сақчи өлтүрүлгән иди. Пәйшәнбә күни кәчтә америка уруш айропиланлири фалуҗаһдики террорчилар йошуринивалди дәп қаралған нишанларни бомбардиман қилған. Америка һәрбий даирилири, қаршилиқ көрситиш күчлириниң 60 адими йоқитилғанлиқини җакарлиди. Фалуҗаһдики сәһийә даирилири болса өлгәнләр ичидә пуқраларниңму барлиқини билдүрмәктә . Бу арида америка мәркизи ахбарат идариси, ирақтики тоқунушниң шиәләр, сүннийләр вә кордлар оттурисидики тоқунушқа айлинип кетиш еһтимали барлиқини илгири сүргән. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт