Baghdadta yene partlitish weqesi yüz berdi

Iraq paytexti baghdadta jüme küni özini öltürüwélish xaraktérlik partlash weqesi yüz berdi. Britaniye radi'o- téléwiziye shirkiti b b s, partlash weqesi az dégende besh ademning jénigha zamin bolghanliqini xewer qildi.

Roytérs axbarat agéntliqi iraq da'irilirining melumatini neqil keltürüp, weqede 13 ademning ölgenlikini ilgiri sürgen. Partlash baghdad sheher merkizidiki bir awat kochida yüz bergen, özini öltürüwélish xaraktérlik hujum sheher merkizidiki reshid kochisida bir saqchi mashinisini nishan'gha alghan. Weqedin sel ilgiri amérika qisimliri bilen iraq qarshiliq körsitish küchliri arisida reshid kochisining yénidiki hayfa mehelliside qattiq toqunush bolghan idi. Bu iraq saqchi qisimlirining mushu bir hepte ichide 3 - qétim chong kölemdiki hujumgha uchrishi bolup hésablinidu.

Buning aldida seyshenbe küni yüz bergen baghdadtiki partlash weqeside 47 adem ölgen, baqubadiki iraq saqchilirigha qaritilghan hujumda 10 saqchi öltürülgen idi. Peyshenbe küni kechte amérika urush ayropilanliri falujahdiki térrorchilar yoshuriniwaldi dep qaralghan nishanlarni bombardiman qilghan. Amérika herbiy da'iriliri, qarshiliq körsitish küchlirining 60 adimi yoqitilghanliqini jakarlidi. Falujahdiki sehiye da'iriliri bolsa ölgenler ichide puqralarningmu barliqini bildürmekte . Bu arida amérika merkizi axbarat idarisi, iraqtiki toqunushning shi'eler, sünniyler we kordlar otturisidiki toqunushqa aylinip kétish éhtimali barliqini ilgiri sürgen. (Erkin)