Шималий корийә рәһбири ким җуңилниң бейҗиңда хитай рәһбәрлири билән көрүшкәнлики илгири сүрүлди

• 
  2006-01-17

Шималий корийә рәһбири ким җуңилниң җәнубий җуңгони мәхпий зиярәт қилғандин кейин бейҗиңға қайтип келип, сәйшәнбә күни хитай рәһбәрлири билән көрүшкәнлики хәвәр қилинди.

Җәнубий корийә йонхап ахбарат агентлиқиниң исмини ашкарилашни халимайдиған дипломатик мәнбәләрдин игилишичә, 30 машинидин тәркип тапқан бир әтрәт дүшәнбә күни әтигәндә дявйүйтәй дөләт миһманханисиға кирип кәткән. Ким җуңил сәйшәнбә күни хәлқ сарийида хитай дөләт рәиси ху җинтав билән көрүшүп, шималий корийә ядро қораллар мәсилиси бойичә 6 дөләт сөһбитини музакирә қилған болуши мүмкин.

Хитай ташқий ишлар министирлиқи баянатчиси куң чүән, ху җинтавниң ким җуңил билән көрүшкәнликини етирап қилмиди. Әмма шуниң биргә инкарму қилмиди. У, " мән ху җинтавниң бүгүн чәтәллик рәһбәрләр билән көрүшидиғанлиқини билимән......... Бирақ қанчиси билән көрүшидиғанлиқидин хәвирим йоқ " дәйду.

Ким җуңил илгири хитайда елип барған 3 қетимлиқ зияритини мәхпий тутқан. У, ахирқи қетим хитайни 2004 - йили 4 - айда зиярәт қилған. Хитай тәрәп ким җуңилниң зияритини у дөлитигә қайтип кәткәндин кейин елан қилған.

Хәвәрләрдә ейтишичә, ким җуңилниң айрупиланға чүшүштин қорқуш кесили болғанлиқтин хитайға пойиз билән барған болуши мүмкин. Көзәткүчиләр, әгәр ким ху җинтав билән көрүшсә ядро қораллар мәсилиси уларниң сөһбитидики асаси тема болиду, дәп қаримақта. (Әркин)