Хитай һөкүмити шималий корийә ядро қораллири мәсилисидә күчәйдиғанлиқини билдүрди


2005-02-13
Share

Шималий корийиниң әнәнивий иттипақдиши болған хитай, пйоңяңниң ядро программисини бикар қилиш йолидики көп тәрәплимә сөһбәтни әслигә кәлтүрүшкә тиришидиғанлиқи һәққидә вәдә бәрди.

Өткән пәйшәнбә күни шималий корийә өзиниң ядро қоралға игә икәнликини вә ядро киризисини һәл қилиш йолида икки корийә, америка, японийә, русийә вә хитай қатнишиватқан алтә тәрәп сөһбитидин чекинип чиққанлиқини билдүргәндин кийин, һәр қайси тәрәпләр, пйоңяңни әң чоң иттипақдиши болған хитайни шималий корийигә бесим ишлитишни тәләп қилған.

Америка бирләшмә ахбарат агентлиқиниң хәвиригә қариғанда, хитай ташқи ишлар министири ли җавшиң шәнбә күни кәчтә америка ташқи ишлар министири кондилиза райисқа телефон қилип, хитайниң һәр қайси тәрәпләр билән йеқиндин алақилишип, алтә тәрәп сөһбитини пат арида әслигә кәлтүрүшкә тиришидиғанлиқини билдүргән. Ли җавшиң йәнә, бейҗиңниң корийә йерим арилини ядросизландурушни қәтий қоллайдиғанлиқини тәкитлигән. Хәвәргә қариғанда, хитай һөкүмити пат арида пйоңяңға әлчи әвәтмәкчи икән.

Буниңдин сирт, шималий корийигә һесдашлиқ қилип келиватқан русийиниң, дөләт мудапиә министири сергий иванофму шәнбә күни баянат елан қилип, шималий корийиниң алтә тәрәп сөһбитидин чекинип чиқиш қарарини "хата" дәп әйиблигән.

Америка һөкүмити буниң алдида, шималий корийиниң бивастә сөһбәт елип бериш тәлипини рәт қилип, көп тәрәплимә сөһбәтниң шималий корийә мәсилисини һәл қилидиған бирдинбир мувапиқ йол икәнликини билдүргән иди. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт