Койзуми ясиконуни зиярәт қилиш вәдисидин қайтмиди

• 
  2006-08-08

японийә баш министири җуниширо койзуми сәйшәнбә күни келәр һәптә ясикону бузрукгаһини зиярәт қилип, 2 - дуня урушида өлгән қурбанларға дуа - тилавәт қилиш тоғрисидики вәдәм давамлиқ күчгә игә, дәп көрсәтти.

Бирләшмә ахбарат агентлиқиниң хәвәр қилишичә, койзуми 2001 - йили японийә әркин демократлар партийисиниң рәһбәрликини талашқанда ясикону бузрукгаһидики уруш қурбанлирини баш министирлик салаһийитим билән зиярәт қилимән, дәп вәдә бәргән. Шуниңдин бери койзуми ясиконуни һазирғичә 5 қетим зиярәт қилған болсиму, лекин бу зиярәт 8 - айниң 15 - күнидин башқа күнләргә тоғра кәлди.

Хәвәрләргә қариғанда җоңго билән җәнубий корийә японийигә наразилиқ билдүргән, лекин койзуми бу зиярәтни урушниң қайта йүз бәрмәслики үчүн дуа - тилавәт қилиштур, дәп ақлимақта.

японийә мәтбуатлириниң хәвәр қилишичә, бу йил 4 - айда ясикону бузрукгаһини мәхпий зиярәт қилған японийә ички кабент министири шинзо абе, баш министир койзуминиң 15 - авғуст күни ясиконуни зиярәт қилиш - қилмаслиқи униң асаси қанунда бәлгиләнгән диний әркинлик һоқуқи, дәп көрсәтти. Шинзу абе бу йил 9 - айда баш министирлиқ вәзиписидин айрилидиған койзуминиң орниға сайлиниш мүмкинчилики әң зор, дәп қариливатқан намзатлардин бири. (Әркин)