Mongghuliye bash ministiri Uyghur aptonom rayonini ziyaret qildi

Mongghuliye bash ministiri myégonbo énkbold jüme küni Uyghur aptonom rayonini ziyaret qilip, ürümchide aptonom rayonning re'isi isma'il tiliwaldi bilen söhbet élip bardi.

Xitay bash ministiri wén jyabawning teklipi bilen xitayni ziyaret qiliwatqan énkboldning ürümchi ziyariti 2 kün dawam qilishi mumkin. Bu bir mongghuliye yuqiri derijilik rehbirining xitay kompartiyisi Uyghur aptonom rayonini ötküzüwalghan 57 yildin béri tunji qétim rayonni ziyaret qilishidur.

Xitay metbu'atliri söhbetning tepsili ehwalini tilgha almighan bolsimu, lékin isma'il tiliwaldining shinjang bilen mongghuliye "iqtisadi- soda alaqisini kéngeytish yoshurun küchi zor bolush alahidilikige ige," dep tekitligenlikini xewer qildi.

Énkbold, 22 - noyabirdin béri xitayni ziyaret qilmaqta. Mongghuliye bash ministirining ikki künlük Uyghur aptonom rayoni ziyaritining konikit küntertipi élan qilinmidi.

Mongghullar bilen Uyghurlar uzun tarix we medeniyet alaqisigha ige milletler. Uyghur aptonom rayonining bayin'ghulin we börtala oblastlirigha mongghullar yashimaqta. Bezi közetküchiler, mongghuliye bash ministirining ziyariti bu yerdiki mongghullarni righbetlendürüsh, dep qarimaqta.

Énkbold, bu sepiride xitay bash ministiri wén jyabaw bilen xitay - mongghuliye siyasi, iqtisadi we medeniyet alaqisini kéngeytishke qoshulghan. Lékin mongghuliye parlaméntida öktichi partiyilerning tenqidige uchrimaqta. Öktichiler énkbold hökümitini mongghuliyining teb'iy kan bayliqini xitay shirketlirige sétish bilen eyiblenmekte. (Erkin)