Gherp elliridiki Uyghurlar xitay elchixanisining aldida namayish ötküzdi

Gherp elliride yashaydighan Uyghurlar 1- öktebir xitay dölet bayrimi munasiwéti bilen gérmaniye, amérika we türkiye qatarliq döletlerdiki xitay elchixanilirining aldida namayish ötküzdi.

Türkiye paytexti anqerediki xitay elchixanisi aldidiki namayishni merkizi qeysiridiki sherqiy türkistan mediniyet we hemkarliq jemiyiti uyushturghan. Amérika paytexti washin'gtondiki namayishni amérika Uyghur jemiyiti teshkilligen. Gérmaniyediki namayish dunya Uyghur qurultéyi bilen yawropa sherqiy türkistan ittipaqining riyasetchiligide élip bérilghan.

Amérika Uyghur jemiyiti namayish ötküzüsh toghrisidiki uqturushida, 1 - öktebir eziz wetinimiz sherqiy türkistanning komunistik xitay qoralliq qisimliri teripidin ishghal qilin'ghanliqining 55 - yilliqi, bu kün Uyghur tarixidiki eng zulmetlik we qarangghu dewrning bashlinishi dep körsetken. Gérmaniyediki namayish myunxén shehridiki xitay konsulxanisi aldida ötküzüldi. Türkiye bilen gérmaniyediki namayishchilar xitay elchi we konsulxanisining aldigha qara gülchembirek qoydi.Washin'gtondiki namayish shu yerning waqti bilen sa'et 3 din 5 kiche ötküzüldi. Gérmaniyediki namayishqa mongghullarmu ishtiraq qilghan. (Erkin)