Barak obama dalay lamagha xet yézip tibetlerni qollaydighanliqini bildürdi

Xelq'ara tibet herikiti teshkilatining bildürüshiche, amérika dölet prézidént namzati barak hüseyin obama, tibet diniy dahisi dalay lamagha xet yézip " uninggha bolghan aliy hörmitini bildürüp" mushu jiddiy weziyette siz hem sizning xelqingizning élip bériwatqan heriketlirini qollaymen " dégen.
Muxbirimiz gülchéhre xewiri
2008.07.29

 Prézidént namzati barak obamaning bu mektubi, dalay lamagha amérikining hindistanda turushluq bash elchisi jéffréy badér arqiliq yetküzülgen bolup, obama xétide yene dalay lamaning yéqinda amérikigha qilghan ziyariti jeryanida waqitning jiddiyliki seweblik uchrishalmighanliqidin nahayiti epsuslan'ghanliqini bildürgen.

Buning aldidayeni 25‏ - iyul küni, obamaning nöwettiki reqibi jumhuriyetchiler partiyisining prézidént namzati John Mccain, amérikida ziyarette boluwatqan tibetlerning diniy we siyasiy dahisi dalay lama bilen körüshken shundaqla 45 minuttin uzaq söhbetleshken idi.

Jan mékkeyin, dalay lama bilen uchrishishidin kéyin muxbirlargha bergen bayanatida, xitay hökümitini kishilik hoquqqa hörmet körsitishke we türmidiki tibetlik siyasiy mehbuslarni qoyup bérishke chaqirghan. Jan mékkeyin xitay hökümitining mart éyida tibette yüz bergen qozghilangni qattiq qol bilen basturghanliqini eyibligen idi.

Xelq'ara tibet herikitining bildürüshiche, démokrat partiyisining prézidént namzati barak obama 2005‏ - yili dalay lama bilen körüshken. Obama dalay lamagha yazghan xétide dalay lama bilen yéqin arida uchrishishni we tibetlerning siyasiy hem kishilik hoquq weziyiti qatarliq mesililer üstide söhbette bolushni ümid qilidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.