Кишилик һоқуқ тәшкилатлири хитайдин өлүм җазасини азайтишни тәләп қилди


2007.06.07

Америкидики кишилик һоқуқ тәшкилатлиридин бири һесабланған " диалог фонди җәмийити"ниң башлиқи пәйшәнбә күни, " әгәр бейҗиң даирилири олимпикниң ғәлибилик өткүзүлүшини үмид қилса, өлүм җазаси иҗра қилишни азайтиши һәмдә дарфурда йүз бериватқан зораванлиқ һәрикәтлириниң алдини елишқа түрткә болуши керәк " дәп тәләп қилди.

Франсийә агентлиқи диалог фондиниң рәиси камниң сөзини нәқил кәлтүрүп, " олимпик мурасиминиң нәтиҗилик өткүзүлүши, хитайниң нөвәттики әң алий нишани, чүнки бу хитайниң кишилик һоқуқ хатирисидики сәтчиликлириниң ғәрб әллиридә қалдурған изналарниң өчүрүлишигә ярдәм көрситиду" деди.

Диалог фондиға охшаш һәрқайси кишилик һоқуқ тәшкилатлири, хитайниң кишилик һоқуқни яхшилимай туруп, олимпик мурасими өткүзүшкә лайиқ һесабланмайдиғанлиқини тәкитләп кәлмәктә. Болупму, чәтәлләрдә паалийәт елип бериватқан уйғур вә тибәт тәшкилатлири, хитайниң олимпик өткүзүш салаһийитигә лайиқ әмәсликини һәм бу салаһийитини байқут қилишни тәләп қилмақта.

Олимпик мурасими үчүн җидди тәйярлиқ көриватқан хитай, суданға қорал - ярақ екиспорт қилиш һәмдә судандин нефит импорт қилиш һәрикити билән хәлқара җәмийәтниң қаттиқ тәнқидигә дуч кәлмәктә.

Хитай сиясий мәһбусларни өлүм җазаси билән әң көп җазалайдиған дөләтләрдин бири һесаблиниду.(Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.