Пакистан парламент сайлимида өктичи партийиләр үстүнлүкни игилиди


2008.02.19

Дүшәнбә күнидики пакистан парламент сайлам нәтиҗисигә қариғанда,пакистан ислам иттипақи билән пакистан хәлқ партийисидин ибарәт икки чоң өктичи партийиниң еришкән авази үстүнлүкни игилигән болуп, буниң билән пәрвиз мушәррәпниң сиясий иттипақдашлири парламент сайлимида мәғлуп болғанлиқиға тән бәргән.

Өктичи партийиләрниң қоллиғучилири нөвәттә кочиларда шерип билән буттониң исимлирини товлап тәнтәнә қилишқа башлиған.

Пакистан парламент сайлими әслидә 1 ‏- айниң 8 ‏- күни елип бериш пиланланған болуп, бирақ хәлқ партийиси рәһбири бинәзәр бутто ханимниң 27 ‏- декабир күни сүйиқәст билән өлтүрүлүши түпәйли, сайлам кечиктүрүлгән иди.

Гәрчә, бу қетимлиқ сайлам давамида пакистан даирилири сайламниң чоқум әркин вә адил, хатирҗәм өткүзүлүшигә капаләтлик қилиш үчүн өктичи партийә қоллиғучилириниң сайламда наразилиқ намайиши елип бармаслиқини алаһидә тәкитләп,нәччә йүз миң кишилик һәрбий қисимларни тинчлиқни сақлашқа қойған болсиму, әмма йәнила алдинқи оттуз нәччә саәт ичидә 24 адәм зораванлиқ һәрикәтлиридә җенидин айрилған. Көп сандики амма беләт ташлаш үчүн сиртларға чиқишқа җүрәт қилалмиған.

Гәрчә, сайламниң әң ахириқи нәтиҗиси сәйшәнбә кәчтә мәлум болидиған болсиму, көзәтчиләрниң қаришичә, зораванлиқ һәрикәтлири түпәйли пәйда болған әндишә, бу қетимқи сайламниң беләт ташлаш нисбитиниң төвән болушини кәлтүрүп чиқириши мумкин. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.