Pakistandiki qebile re'isi osma bin ladin we molla ömerge panahliq bérishke teyyar ikenlikini bildürdi

Pakistan- afghanistan chégra rayonida panahlan'ghan özbék militantlar we ularning yerlik qollughuchilirigha qarshi heriket élip bériwatqan peshtun qebile rehbiri molla nezir exmet, eger yerlik qebililerning qa'ide-qanunlirigha we en'enilirige hörmet qilidighanliqini wede qilsa, osma bn ladin'ghimu rayonda panahliq béridighanliqini bildürdi.

Molla nezir exmet jüme küni muxbirlargha bergen bayanatida, peshtun milliy en'enisining panahliq telep qilghan chet'elliklerge panahliq bérilishige kapaletlik qilidighanliqini we osma bin ladin we molla ömer qatarliq kishilerning buning sirtida qalmaydighanliqini tekitligen. Lékin u osma bin ladin we molla ömer bilen munasiwiti yoqliqini hemde ularning qaysi yerde ikenlikini heqqide héchqandaq melumatqa ige emeslikini bildürdi.

Chet'ellik militantlargha bolupmu, özbékistan islamiy herikitining rehbiri tahir yoldash rehberlikidiki özbék militantlargha qarshi heriketning dawamlishidighanliqini tekitligen molla nezir, "eger chet'elllik militantlar teslim bolsa, ularni kechürüm qilimiz. Lékin özbék militantlar buning sirtida" dep körsetti.

Afghanistandiki talibanlar hakimiyiti 2001‏- yili amérikining herbiy herikiti netijiside gumran bolghandin kéyin, minglighan özbék, chichen we ereb qatarliq minglighan chet'ellik militant afghanistandin qéchip pakistanning qebililer rayonida panahlan'ghan.

Rayondiki peshton qebililiri ulargha panahliq bergen idi. Lékin pakistan- afghanistan chégra rayonidiki qebililer mart éyida bir qebiler rehbiri chet'ellik militantlar teripidin öltürülgendin kéyin, pakistan armiyisining yardimi bilen chet'ellik militantlargha asasen özbék militantlirigha qarshi hujumgha ötdi.

Molla neziz exmetning éytishiche, yéqinqi heptilerde pakistan armiyisining yardimi bilen élip bérilghan heriketlerde rayonda 300 etrapida chet'ellik militant ölgen. (Qanat)