Рим папаси ислам дунясиниң вәкиллири билән учрашти


2006.09.25

Рим папаси 16‏- бинидикт дүшәнбә күни ватикандики мусулман дөләтләрниң баш әлчилири һәмдә ислам тәтқиқат инстетутлириниң вәкиллири билән көрүшүп, ислам дунясида униң йеқинда бәргән бир баянатидин кейин пәйда болған ғәзәпни пәсәйтишкә тиришти.

Америка бирләшмә агентлиқиниң хәвәр қилишичә, йиғинда қилған сөзидә, ислам диниға чоңқур һөрмити барлиқини вә дуняниң келәчәкиниң мусулманлар билән христианлар оттурисида қурулидиған яхши алақә билән зич мунасивәтлик икәнликини билдүргән рим папаси, йиғилишқа қатнашқан ислам дөләтлириниң әлчилири билән бир- бирләп қол илишип көрүшүп һал сориған.

Рим папаси 16‏- бинидиктниң 12‏- сентәбир күни германийә зиярити җәрянида ислам дини вә һәзрити муһәммәт әләйһиссалам һәққидә қилған сөзлири дуня мусулманлири арисида қаттиқ наразилиқ долқуни қозғиған иди. Бу наразилиқ түпәйлидин рим папаси, германийидә қилған сөзлириниң хата тәбирлинип қалғанлиқини билдүрүп, бу сөзлириниң мусулманларни рәнҗиткәнликидин қаттиқ әпсусланғанлиқини баян қилған. Лекин у дунядики бәзи мусулман рәһбәрләр тәләп қилғандәк ислам дунясидин рәсмий бир әпу сораштин өзини қачурған.

Мутәхәссисләр, рим папасиниң мусулман дөләтләрниң баш әлчилири вә ислам диний рәһбәрлири билән учришишини, униң ислам дунясиниң көңлини елиш һәрикитиниң бир қисими дәп тәбирлимәктә. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.