Xitayning amérikidiki bash elchixanisi Uyghur qizlirini xitay ölkilirige yötkep ishqa orunlashturush mesilisige inkas qayturdi

Ötken charshenbe küni amérika dölet mejliside xitaydiki ayallar we balilar etkeschiliki toghrisida échilghan ispat bérish yighinida amérika xitayni adem etkeschilikige zerbe bérishke ehmiyet bérishke chaqiriq qilghan idi.Shundaqla rabiye qadir xanim yighinda xitay ölkilirige yötkiliwatqan Uyghur qizlarning ehwali toghrisida doklat bérip, " biz qizlar qullar emgikige sélinipla qalmay, jinsiy mulazimetchi qilinish yoshurun xewpige duch kéliwatidu, dep qaraymiz " dégen idi.

Shuningdek, amérika awam palata ezasi kiristofér simit "xitay da'irilirining 16 yashtin 25 yashqiche bolghan Uyghur qizlirini xitay ölkilirige yötkesh siyasiti keng kölemlik "irqiy tazilash" ning bir qisimi, dep qaraydighanliqini eskertken.

Bügün xitayning amérikidiki bash elchixanisi, amérika dölet mejlisining hemde rabiye qadir xanimning charshenbe künidiki ispat bérish yighinida xitayning adem etkeschiliki mesilisi heqqidiki tenqidlirini inkar qildi.

Amérika awazi radi'osining xewiride körsitishiche, xitayning amérikidiki bash elchixanisi bayanatchisi wang bawdung "Uyghur qizlirini ichkiri ölkilerge yötkep ishqa orunlashturush jeryanida bezi bir zorawanliq hem qanunsiz qilmishlardin saqlinalmighan bolushi mumkin, emma bu dölet siyasiti bilen munasiwetsiz "dégen.

U yene " bezi kishiler munasiwetlik da'irilerge hödde qilip aridin payda aldighan qilmishlarni yoq déyelmeymen, chünki mesile murekkep, shundaqtimu buni hökümet orunlashturghan déyishke bolmaydu, uning üstige hökümetning bu heqte mexsus siyasiti hem chüshürgen sani bar déyish tolimu bimenilik, junggo hökümiti bundaq ishlarning yüz bérishige yol qoymaydu.Junggo hökümiti bu mesilide rabiye qadirgha oxshash bölgünchilerning éytqanlirigha ishen'gili bolmaydu dep qaraydu" dep bildürgen.

Xitay hökümitining Uyghur qizlirini xitay ölkilirige mejburiy yötkesh siyasiti adem etkeschilikke yatamdu ? dégen mesile amérika dölet mejlisining diqqitini qozghighan bolup. Amérika tashqi ishlar ministirliqining adem etkeschilikige qarshi turush we nazaret qilish bölümining bashliqi mark léygon, xitayning Uyghur qizlirini xitay ölkilirige mejburiy yötkesh siyasitini xitay hökümitining "melum siyasiy pilan" ning bir qisimi, dep eskertip, "eger siz mesilige erkin asiya radi'osi we bashqa tereplerning Uyghurlarni, bolupmu Uyghur ayallirini béyjing, tyenjin, jyangsu, chingdaw, sendunggha yötkep, töwen derijilik emgekke séliwatqanliqi heqqidiki bayanlirigha bir pütün gewde süpitide qarisingiz, bu xitay hökümitining sherqiy türkistanni ilgiriligen halda kontrolluqi astigha élish siyasiy pilanining bir qisimi ikenlikige ishinip qalisiz " dégen idi.

Xitay hökümiti 2007 - yili féwralda, bu yil Uyghur élidin xitay ölkilirige yötkep ishqa orunlashturidighan éshincha emgek küchini bir milyon ikki yüz minggha yetküzidighanliqini shundaqla jenubiy Uyghur élidiki yézilardin yötkeshni asas qilidighanliqini élan qilghan idi. (Gülchéhre)

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar