Дуня сәһийә тәшкилати хәлқара җәмийәтни қуш зукимидин сәгәк болушқа чақирди
2007.12.17
Пакистан вә бирмиларда йеңи қуш зукими юқумдарлири байқалғанлиқи мәлум болғандин кейин 17- декабир дүшәнбә күни дуня сәһийә тәшкилати қуш зукиминиң қайда әдәп кетиш хәтири барлиқини билдүрүп дунядики башқа дөләтләрни бу зукамдин сәгәк болуш һәққидә агаһландуруш бәрди.
Дуня сәһийә тәшкилати хадимлири юқумлиниш әһвали вә вирус типини айриш үчүн пакистанға йетип кәлди. Мәлум болушичә, улар дохтурханиларда вә юқумлиниш байқалған районларда тәкшүрүш елип баридикән.
Дуня сәһийә тәшкилати ғәрбий тинч окян райониниң баянатчиси петир кордиңлейниң бирләшмә агентлиқиға билдүргәнлиригә қариғанда, тәшкилат хадимлири пакистан һөкүмити сәһийә министирлики вә йеза игилик министирлики билән учур алмаштуруш алақисини күчәйткән. Униң билдүрүшичә йәнә, илгири пакистан һөкүмәт хадимлири йеңидин байқалған қуш зукиминиң юқумлиниш әһвални дуня сәһийә тәшкилатиға вақтида доклат қилмиған икән.
Хәвәрдә көрситилишичә, пакистанниң пайтәхти исламабадқа йеқин җайлашқан абботабад шәһиридә 4 ака-ука вә уларниң бир нәврә туғқини вә бу райондики қушханида үч қассапниң H5N1 типлиқ қуш зукими вируси билән юқумланғанлиқи байқалған болуп, бу төт ака-укиниң иккиси мәзкур вируста қаза қилған.
Дуня сәһийә тәшкилати баянатчиси грегорй хартлиниң билдүрүшичә, һазирчә мәзкур вирусниң адәмдин адәмгә юқуш әһвали байқалмиған. Әмма у: "гәрчә һазирғичә бу вирусниң адәмдин адәмгә юқуш әһвали муқимлаштурулмиған болсиму, әмма биз һазир юқири дәриҗидә сәгәк туруватимиз" дегән.
Алдинқи җүмә күни, бирмида 7 яшлиқ бир қизниң мәзкур вирус билән юқумлинип һаят қалғанлиқи хәвәр қилинғандин башқа мушу һәптә ахири германийә вә башқа дөләтләрдиму мушу хил вирустин юқумлиниш әһвали байқалған.
Мәлум болушичә, йеқинда хитайда икки адәмдә бу хил вирус байқалған буларниң ичидә бирси өлгән. 2003 - Йилида пүтүн дуня бойичә 208 адәм H5N1 типлиқ қуш зукими вируси билән өлгән иди.
Мунасивәтлик мақалилар
- Қуш зуками асия дөләтлиридә қайтидин оттуриға чиқти
- Хитайда 50 милйон адәм әйдиз билән юқумлиниш хәвпидә яшаватиду
- Хитайда әйдиз юқумдарлириниң сани 700 миңға йәтти
- 'Хитайчә заманивий кесәллик' кә гириптар болуватқан кишиләрниң сани 16 милйонға йәтти
- Дуня буйичә әйдиз юқумлири сани төвәнлиди
- Хитайда қуш зукими өрдәкләрдә байқалди
- Хитайда әйдизниң көпийишигә мунасивәтлик йеңи сәвәб елан қилинди
- Хитай дунядики итиварини қайтидин тикләш үчүн бәзи ширкәтләрни тақашқа башлиди
- юқумлуқ қуш зуками вируси пүтүн йәршариға тарқалмақта
- Муһит булғинишидин хитайда һәр йили йүз миңлиған адәм өлмәктә