Yuqumluq qush zukami wirusi pütün yersharigha tarqalmaqta

Dunya sehiye teshkilatining tor bétide 7 ‏- ayning 11 ‏- küni, hindonéziyide 6 yashliq bir oghul bala qush zukami bilen yuqumlinip ölgenliki élan qilindi.

Roytrs agéntliqining bayan qilishiche, eng burun en'gliyining shotlandiyide 1959 ‏- yili H7N7 belgilik qush zukami wirusi bayqalghan idi. Bu xil wirus 2006 ‏- yili yene shotlandiyide tekrar bayqaldi. Emma qush zukami wirusining bashqa birxil tipi bolghan H5N1 belgilik ademdin ‏- ademge yuqudighan wirusi 1997 ‏- yili xongkongda bayqalghandin kéyin, bu xil wirus 2003 ‏- yiligha kelgende ezerbeyjan, kambodzha, xitay, misir, hindonéziye, iraq, la'us, négiriye, tayland, türkiye, wyétnam qatarliq 39 döletke tarqaldi. Bultur yene 30 döletke kéngeydi.

Hazirgha qeder, yuqumluq qush zukami wirusi bilen yuqumlan'ghanliqi doxturxanilarda éniqlan'ghan 318 ademning 192i dawalash ünüm bermey ölüp ketti. Qush zukamidin mudapi'e körüsh jeryanida 30 milyon qush öltürüldi. Hazir hetta aqqularmu bu xil wirusni tarqitidighan qushlar tewesige kirip qaldi.

Xewerde bayan qilinishiche, yuqumluq qush zukami wirusi bilen yuqumlan'ghan kishide, adettiki zukamgha oxshash isitmisi örlesh, yötilish, dimaq -gal échishish, pütün moskullar aghrish, közi qizirish alametliri peyda bolidiken. Yuqumluq qush zukami wirusidin, bolupmu ademdin ‏-ademge yuqudighan qush zukami wirusidin mudapi'elinish üchün , hazir pütün dunya birdek jiddiy tedbir qollinishqa toghra kelmekte. (Weli)