Yaponiyide rabiye qadir xanim heqqide kitab neshir qilindi

Yéqinda yaponiyide, Uyghur milliy herikiti rehbiri, Uyghurlarning meniwiy anisi rabiye qadir xanimning sergüzeshtiliri heqqide mexsus bir kitab neshrdin chiqti.

" Junggodin qoghlap chiqirilghan ayal" namliq mezkur kitabning aptori, yazghuchi mizutani na'oko xanim bolup, kitab 272 betlik hejimde, kitabta asasliqi, nobil tinchliq mukapatining üch qétimliq küchlük namzati bolghan rabiye qadir xanim hem uning Uyghur kishilik hoquq pa'aliyetliri we bashqa Uyghur pa'aliyetchilirining chet'ellerde élip bériwatqan Uyghur dawasi tonushturulghan we shundaqla xitay hökümitining Uyghurlar üstidin élip bériwatqan basturush heriketliri hemde kishilik hoquq depsendichilikliri heqqidiki mezmunlar kirgüzülgen.

Yaponiyidiki Uyghurlar hemde Uyghurlargha qiziqquchi, tetqiq qilghuchi hem Uyghurlarni dost tutquchi yaponlar mezkur kitabning neshrdin chiqqanliqidin intayin xoshal bolghan.

Nöwette yaponiyidiki bezi metbu'atlar rabiye qadir xanim toghrisidiki mezkur kitabning neshrdin chiqqanliqini xewer qilghandin bashqa, yéqinda yeni 11 - ayning bashliri rabiye qadir xanimning yaponiyide mexsus ziyarette bolidighanliqi hemde bu jeryanda Uyghurlarning weziyiti toghrisida notuq sözlesh pa'aliyetliride bolidighanliqidin uchurlar bergen.

Bu kitab rabiye xanimning terjimihali heqqide, bu yil 6 - ayda " güldürmama" namliq némis tilida gérmaniyide neshrdin chiqqan 430 betlik chong hejimlik kitabtin kéyinki ikkinchi bir chet'el tilida chiqirilghan kitab hésablinidu.

Yapon xelqi uzundin buyan Uyghurlarni dost tutup kéliwatqan xelq bolup, yaponluqlar Uyghur éli hem xelqige türlük sahelerde yardem qolini sunup kelmekte. Yéqinqi yillardin buyan Uyghurlarning tarixi we medeniyitidin bashqa Uyghurlarning siyasiy teqdirimu yaponluqlarda qiziqish qozghighan. (Gülchéhre)