Xitay, radi'omizning tibet bölüm muxbirini chégridin kirgüzmidi

Radi'omizning tibet bölüm muxbiri Dhondup Gonsar tünügün, béyjing olimpiki jeryanida axbaratchiliq qilish üchün yolgha chiqqan idi. U chégragha kelgende xitay kirish ruxsiti bermigen.
Muxbirimiz shöhret hoshur xewiri
2008.08.07

 Muxbir Dhondup Gonsar tibetlik amérika wetendishidur. Eslide uning béyjing olimpikigha qatniship muxbirliq qilish salahiyiti xelqara olimpik komitéti teripidin testiqlinip bolghan we barliq chégridin kirish resmiyetliri toluq idi. Radi'omiz bu munasiwet bilen bügün bayanat élan qilip, xitayni eyiblidi.

Radi'omiz bayanatida, xitay hökümitini muxbir Dhondup Gonsar ning derhal yolini échishqa chaqirdi we xelqara olimpik komitétining mes'uli Jacques Rogge ependidin, béyjing olimpikini dunyagha ochuq bolush prinsipigha emel qildurushni telep qildi.

Xitay béyjing olimpikigha birinchi derijilik tehdit Uyghurlar, ikkinchi derijilik tehdit tibetlikler dep qarimaqta. Tünügün xitay kishilik hoquq pa'aliyetchisi yang jyenlimu chégrida tosuwélin'ghan idi.

Qolida xitay pasporti bolghan yang jyenli bügün yaponiyige yolgha séliwétilgen. Öz wetendishini chégridin kirgüzmeslik olimpik sahipxanliqi tarixidiki tunji weqe hésablinidu.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.