Русийидә тақирбашлар һәрикити күчәймәктә


2007.05.15

Совет иттипақи йимирилгәндин кейин, русийидә милләтчилик һәрикәтлириниң җүмлидин рус милләтчиликиниң күчийип кәткәнлики мәлум.

Инкаслардин қариғанда, чечән урушидин кейин милләтчиликниң техиму юқири пәллигә көтүрүлүшкә башлиғанлиқи, йеңидин пәйда болған рус милләтчи яш өсмүрлириниң "тақирбашлар" дәп аталған гуруппилириниң қара чачлиқ милләт адәмлирини, болупму көчмәнләрни уруш вә өлтүрүш қилмишлириниң көпийишиниң русийиниң ички бихәтәрлики һәм дөләт абройиға нисбәтән тәһдид пәйда қиливатқанлиқи русийә қанун һимайичилири тәрипидин давамлиқ оттуриға қоюлмақта.

Тақирбашларниң сани давамлиқ ашмақта

Русийә мәтбуатлири қанун һимайичилириниң рус милләтчиликиниң ипадиси һесаблинидиған "тақирбашлар" һәрикитиниң барғансери күчийип, җәмийәт аманлиқиға тәһдид пәйда қиливатқанлиқини йезишмақта.

Русийәдә чиқидиған интернет тори “newsru” ниң тарқатқан учурлириға асасланғанда, һазир русийидики "тақирбашлар"ниң сани 70 миңдин ашқан болуп, икки йилниң алдида 50 миң әтрапида болған. Нөвәттә, "тақирбашла"ниң сани артипла қалмастин бәлки, уларниң адәмләргә һуҗум қилиш қилмишлири һәр күни дегүдәк, өлтүрүш қилмишлири һәр һәптидә дегүдәк йүз бәрмәктә.

Интерфакис агентлиқиниң москвадики инсан һоқуқини қоғдаш бюросиниң мудири александир бродниң сөзидин нәқил кәлтүрүп учур беришичә, русийә шәһәрлиридә радикал милләтчилик тәшкилатлири милләтләр ара өчмәнлик пәйда қилидиған лозунка астидики аммиви һәрикәтләрни елип беришқа урунмақта.

Тақирбашларниң қолида өлгәнләр көпәйгән

"Тақирбашлар"ниң қолида өлгәнләрниң сани йилдин -йилға көпәймәктә. Интерфакис агентлиқиниң москва инсан һоқуқини қоғдаш бюросиниң мудири александир бродниң истатистикилиқ мәлуматлиридин нәқил кәлтүрүшичә, 2007-йили, январдин априлғичә болған төт ай ичидә пүтүн русийидә 80 қетим ирқчилиқ түси алған һуҗум йүз бәргән болуп, нәтиҗидә 25 адәм өлгән, 80 адәм яриланған.

Бу җәрянда 21 адәм миллий өчмәнлик кәйпияти кәлтүрүп чиқарған дегән җинайәт билән сотланған. Әмма, башқа мәнбәләрдә мәзкур төт ай ичидә "тақирбашлар " тәрипидин 200 қетим һуҗум садир қилинип, нәтиҗидә 25 адәмниң өлтүрүлгәнлики вә 154 адәмниң яридар қилинғанлиқи ейтилған.

Тақирбашларниң һуҗум нишани кимләр?

Русийә фашист милләтчилири дәп қариливатқан тақирбашларниң һуҗум нишани чирайи явропа типиға охшимайдиғанлар болуп, “newsru” ториниң хәвәрлиригә асасланғанда, уларниң асаслиқ һуҗум нишани, кавказлиқлар җүмлидин әзәрбәйҗанлар, грузинлар, әрмәнләр вә оттура асиядин кәлгән өзбекләр, таҗиклар һәм асиялиқлар йәни корейиликләр, хитайлар шуниңдәк африқилиқлардур.

Йеқинқи күнләрдә " тақирбашлар"ниң һуҗумиға учриған киши хитай пуқраси лию яң болуп, у москва қатнаш иниститутиниң оқуғучиси иди. У, 1-май күни " тақирбашлар" тәрипидин пойиз үстидә уруп яриландурулған.

" Тақирбашлар"ниң асаслиқ паалийәт районлири москва, санктпетербург, ростов, владивосток, оренбург, саратов вә башқа чоң шәһәрләрдин ибарәттур. Бу җайларда көчмәнләр бираз көп җайлашқан.

"Сова" мәркизиниң тор бетидин ашкарилинишичә, 1-май күни милләтчиләр москва шәһиридә марш дәссәп намайиш өткүзгән болуп, улар " йоқалсун көчмәнләр ! маашлар өлтүрүлсун ! " һәр хил рәңлик адәмләр мәмликити русларға әмди керәк әмәс !" дегәндәк шоарларни товлиған. Бу һәрикәткә "қанунсиз көчмәнләргә қарши туруш һәрикити", " миллий бирлик", " рус тәртипи" қатарлиқ милләтчи тәшкилатларниң 500 дин артуқ адими қатнашқан. Инкаслардин қариғанда, хәлқаралиқ инсан һоқуқи тәшкилатлири вә қанун һимайичилири русийә һөкүмитиниң "тақирбашлар"ниң бу хил һәрикәтлиригә нисбәтән җиддий чарә -тәдбирләрни қолланмайватқанлиқини тәнқид қилған. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.