Rusiyide prézidént saylimi ötküzüldi

Yekshenbe küni pütün rusiye boyiche prézidént saylimi ötküzüldi. 100 Milyondin artuq adem bilet tashlashqa qatnashqan mezkur saylamda dmitri médwédéwning ghelibe qilghanliqi jezimleshtürüldi.

Rusiyining " newsru" uchur torining xewer qilishiche, deslepki qedemde élan qilin'ghan netije boyiche alghanda, dmitri médwédéw %64 awazgha érishken bolup, kommunistik partiye rehbiri génnadiy zyuganow %19 awazgha, erkin démokratlar partiyisining rehbiri wladimir zhirinowskiy %12 awazgha érishken.

Bu qétim töt namzat saylamgha chüshken bolup, bularning üch nepiri partiye -guruhlargha mensup bolsa, bir nepiri öz aldigha saylamgha qatnashqan. Biraq, uning netijisi eng töwen bolup qalghan.

Bu qétim saylam rusiye sowét ittipaqidin ayrilip chiqqandin kéyinki üchinchi prézidént saylimi bolup, médwédéw rusiyining 3- prézidénti bolidu, wladimir putin bolsa, ikki qétim prézidént bolghan bolup, rusiye asasiy qanuni boyiche bir ademning üch qétim prézidént bolush hoquqi bolmaydu. Wladimir putin taki 5-ayghiche wezipe öteydu hemde 5-ayda resmiy murasim bilen yéngi prézidént dmitri médwédéw qesem bérip wezipe tapshuruwalidu. ( Ümidwar)