Rusiyining sabiq prézidénti boris yéltsin wapat boldi

Rusiyining sabiq prézidénti boris yéltsin 76 yéshida rusiyide alemdin ötti. Krémlning bayanatchisi aléksandir smirnow, yéltsining qaza qilghanliqini delillidi.

Rusiye axbarat wasitiliri rusiye prézidéntlar méditsina merkizining bashliqi sérgéy mironowning éytqanliridin neqil keltürüshiche, yéltsin yürek herikiti tuyuqsiz toxtap qélish seweblik merkizi doxturxanida qaza qilghan.

Birleshme agéntliqining 23 ‏- april bergen xewiride éytilishiche, gerche yéltsin rusiyini démokratiye we bazar igiliki yoligha méngishqa qistighan dölet erbabi bolsimu, nurghunlighan rus puqraliri uni döletning chökishige rehberlik qilghan dep eslishidiken.

Rusiye intérfaks agéntliqining xewirige qarighanda, sabiq sowétler ittipaqining axirqi prézidénti mixaylis gorbachéw, yéltsin'gha baha bérip: "uning zimmisige döletke qilghan nurghun ulugh ish- izliri we yene köpligen xataliqliri mujessemlen'gen" dégen.

Chet'el metbu'atlirida, yéltsin rusiyidiki tunji erkin saylan'ghan prézidént bolush süpiti bilen, prézidéntliq hayati ixtilaplar bilen tolghan zat bolup, chiriklikke qarshi turushqa irade bildürüp, dölet mülkining talan- taraj qilinishini tosushqa urun'ghan bolsimu, qurbi yetmigen, yaki xalimighan. Özi izchil türde erkin metbu'atni qoghdashta ching turup kelgen bolsimu, belki metbu'atni kontrol qilishta kamaletke yetken, dep qaralmaqta.

U -1994 yili chéchéniyining rusiyidin ayrilip musteqil bolushigha qarshi urush bashlighan we minglighan - onminglighan ademlerning ölüshige sewebchi bolghan. Emma -1996 yili meghlup bolup esker chikindürüshke mejbur bolghan. Bu urush héchnémini hel qilalmighan bolsimu, -1999 yili rus eskerliri chéchéniyige yene hujum qozghighan idi.

Yéltsin 1931- yili 1- féwralda oral taghliri étikide déhqan a'iliside dunyagha kelgen bolup, u 2007 - yili 23 ‏-april 76 yéshida alemdin ötti. (Jüme)