Se'udi erebistan radi'osining Uyghurche anglitishi qayta bashlandi

Se'udi erebistandiki ixtiyari muxbirimizning xewer qilishiche, se'udi erebistan radi'osining jidde shehiridin anglitish béridighan "türkistanche" radi'o anglitishi 11 - noyabir künidin étibaren qayta bashlandi. Mezkur anglitish se'udi erebistan hökümitining tereqqiyat pilanigha asasen ariliqta bir qanche ay toxtitilip qoyulghan bolup, tertipke sélish we retleshlerdin kéyin bu qétim qaytidin échilip öz xizmitini bashlidi.

Muxbirimizning igilishiche, türkistanche anglitish mexsus Uyghur éli we sabiq sowét ittipaqining ottura asiya rayonini nishan qilip, 1982 - yili tesis qilin'ghan bolup, deslepte bir sa'et bérilgen. 1999 - Yilidin kéyin ikki sa'etke chiqirilghan, bu mezgilde Uyghur we özbék tillirida arilash anglitish bérilgen bolsa, bu qétim künige üch, yeni Uyghurche bir yérim sa'et, özbékche bir yérim sa'et bolghan hemde Uyghur tili bilen özbek tilidiki programmilar waqit we bashqa jehetlerdin ayrilghan. Hemme xizmetchi xadim 20 nechchige yetküzülgen.

Bu qétim se'udi erebistandin bérilidighan mezkur Uyghurche anglitish programmiliri burunqigha qarighanda yéngilan'ghan we toluqlan'ghan bolup, diniy programmilar yeni qur'an tilawet, qur'ani kérimning tepsiri we bashqilar asas qilin'ghandin sirt yene xelq'ara we se'udi xewerliri, se'udi erebistan padishahliqining weziyiti hem ijtima'iy –iqtisadiy ehwaligha a'it programmilarmu öz ichige élin'ghan.

Igilishimizche hazir chet memliketlerdin amérika qoshma shitatliridin bashqa se'udi erebistan, qazaqistan we qirghizistan Uyghur tilida radi'o anglitishi béridu. 1947 - Yilidin bashlap Uyghurche anglitish bergen özbékistan xelq'ara radi'osi bu yil Uyghur tilida anglitish bérishke chek qoyghan. Eslide bu, dunya boyiche eng tarixi uzun Uyghurche anglitish idi. (Ümidwar)