Шималий корийә өзиниң һәрикитигә диққәт қилиши керәк, бу агаһландурушла әмәс, бәлки нәсиһәт

Шималий корийә өзиниң йәрлик вақти буйичә 7 ‏- айниң 5 ‏-‏ күни әтигән саәт 3 тин 32 минут өткәндин башлап бир нәччә саәт ичидә 7 қетим башқурулидиған бомба синақ қилди. "Бирләшмә агентлиқи"ниң баян қилишичә, шималий корийә синақ қилған 7 данә башқурулидиған бомбиниң аз дегәндә бири йирақ мусапидики нишанларға қарита атидиған башқурулидиған бомба. Шималий корийиниң дапудоң ‏-2 бәлгилик башқурулидиған бомбиси адәттә америкиниң деңиз қирғақлириға йетип баралайду, дәп қарилидиған, қитәләр ара нишанланған нуқтиларға зәрбә бериш үчүн атидиған узун мусапилиқ башқурулидиған бомбиси болуп, у етип чиқирилип 40 секунттин кейин шәрқий деңизға чүшүп кәткән.

Б б с ниң хәвәр қилишичә, шималий корийә 6 ‏- қетим башқурулидиған бомба синақ қилғанда, японийә билән җәнубий корийиниң һәрбий қисимлири һәрбий һаләткә өткән. Бирләшкән дөләтләр тәшкилати корийә вәзийитини музакирә қилидиған йепиқ йиғин ачқан. Мәркизи агентлиқиниң маниладин хәвәр қилишичә, шималий корийә уда 6 қетим башқурулидиған бомба синақ қилғандин кейин, америка-японийә иттипақниң әзаси болған филиппин оттуриға чиқип шималий корийини әйиблигән. Филиппин президент мәһкимисиниң әмәлдари шималий корийини агаһландуруп " бирләшкән дөләтләр тәшкилатниң әзаси болған һәр қандақ бир дөләт дуня тинчлиқиға хәвп кәлтүридиған бундақ һәрикәткә җиддий қарайду" дегән. Австралийә һөкүмитиму буниңға инкас қайтуруп шималий корийини очуқ әйибләпла қалмай, бәлки шималий корийиниң баш әлчисини чақиртип келип "бу шималий корийиниң тинчлиққа қилған риқабити" дегән. Шундақла йәнә австралийә депломатлириниң шималий корийигә баридиған пиланини әмәлдин қалдурған. Франсийиниң баш министири девирспән әпәнди униңдин бир күн бурун фирансийини зиярәт қиливатқан бирләшкән дөләтләр тәшкилатиниң баш катипи кофи аннанға "шималий корийә башқурулидиған бомба синақ қилиш алдида туруватиду, биз буниңға қәтий қарши туримиз, шималий корийә хәлқара җәмийәтниң инкасиға қулақ селиши керәк" дәп баян қилған.

Бирләшмә агентлиқиниң москвадин хәвәр қилишичә, русийә чаршәнбә күни шималий корийиниң баш әлчисини чақиртип келип, шималий корийиниң уда бир қатар башқурулидиған бомба синақ қилғанлиқиға наразилиқ билдүргән. Итартас агентлиқиниң баян қилишичә, шималий корийә синақ қилған башқурулидиған бомба русийиниң деңиз бойлиридин әгип япон деңизиға чүшкән. Хәвәрдә ейтишичә, хитай ташқи ишлар министирлиқиниң баянатчисиму шималий корийиниң уда 7 қетим башқурулидиған бомба синақ қилғанлиқиға қарита инкас қайтуруп, хитай һөкүмитиниң буниңға җиддий қарайдиғанлиқини, мунасивәтлик тәрәпләрниң өзини тутувелип, корийә йерим арилиға пайдилиқ ишларни көпрәк қилишни үмид қилидиғанлиқини билдүргән. Б б с ниң баян қилишичә, бейҗиңда елип бериливатқан 6 тәрәп сөһбитидә бир нәччә айдин буян илгириләш болмиған иди. Шималий корийә өзиниң сөһбәттики салмиқини ашуруш үчүн бу синақларни елип барған болуши мумкин. Хәвәрдә ейтилишичә йәнә, адәттә шималий корийиниң "дапудоң" бәлгилик башқурулидиған бомбилириниң мусаписи 2200 километирдин 6000 километирғичә, корийә даирисидин етилса русийә, хитай, пакистан, һиндистан, австралийә вә америкиниң аляска штатиғичә йетип баралайду, дәп қарилип кәлмәктә.

Америка авазиниң хәвәр қилишичә, америка ташқи ишлар министирлиқиниң баянатида "шималий корийә башқурулидиған бомба синақ қилиш арқилиқ хошна дөләтләргә тәһдит салмақта" дейилгән. Америкиниң японийидә турушлуқ баш әлчиси "әгәр шималий корийиниң башқурулидиған бомба синиқи давамлиқ дәриҗә өрлитип, америка билән иттипақдаш дөләтләргә хәвп йәткүзсә, америка қоғдаш характерлик һәрикәт қоллинишқа тәйяр" дегән. Ақ сарайниң баянатчиси корийини агаһландуруп " шималий корийә дәрһал 6 тәрәп сөһбитигә қайтип келиши керәк, японийә, җәнубий корийә, хитай вә русийиләрниң агаһландурушиға қулақ селиши керәк, һазир өзиниң һәрикитигә диққәт қилидиған дөләт америка әмәс, бәлки шималий корийә , бу агаһландурушла әмәс, бәлки нәсиһәт" дегән. (Вәли)