Yaponiye shimaliy koriye mesilisini xewpsizlik kéngishide muzakire qilishqa aldirimaydu

Yaponiye da'iriliri düshenbe küni shimaliy koriye bashqurulidighan bomba bazilirigha aldin'ala zerbe bérishning yaponiye asasiy qanunigha xilap yaki emesliki üstide izdiniwatqanliqini bildürdi.

Birleshme axbarat agéntliqining xewer qilishiche, yaponiye ichki kabént sékritari shinzu abi shimaliy koriyini ima qilip, " beziler eger biz hujumning aldini alidighan bashqa chiqish yollirini tapalmisaq, bashqurulidighan bomba bazisigha zerbe bérish öz ‏- özimizni mudapi'e qilidighan asasiy qanundiki hoquqimiz, dep qarimaqta," deydu. Lékin u , bu mesilini chongqur muzakire qilishqa toghra kélidighanliqini bildürdi.

Shimaliy koriyining ötken hepte élip barghan bashqurulidighan bomba siniqi yaponiyini jiddiy bi'aram qilghan we xelq'ara jem'iyetning eyiblishige uchrighan idi. 2 - Dunya urushidin kéyin maqullan'ghan yaponiye asasiy qanuni xelq'ara ixtilaplarni urush arqiliq hel qilishni chekligen bolsimu, lékin koyzumi hökümiti bu qanun öz ‏- özini mudapi'e qilish xaraktirlik küch ishlitishke qarshi emes, dep chüshendürüshke intilmekte. Bu munazire yaponiye shimaliy koriyige imbargo qoyush pilanini sun'ghan bir mezgilde élip bérildi. Esli xewpsizlik kéngishi yaponiyining imbargo pilanini düshenbe küni muzakire qilmaqchi idi. Lékin junggo yaponiyining imbargo pilani awazgha qoyulsa ret qilish hoquqini ishlitidighanliqidin bisharet bergen.

Bu ehwalda yaponiye bash ministiri koyzumi, yaponiye imbargo mesilisini xewpsizlik kéngishi choqum düshenbe küni awazgha qoyushi kérek, dep qarimaydu, dédi. Uning eskertishiche, xitayning mu'awin tashqi ishlar ministiri wang yi shimaliy koriyini ziyaret qilip, pyongyangni 6 dölet söhbitige qaytip kélishke ündewatqan bir chaghda imbargo mesilisini awazgha qoyush zörür emes, dep qaraydiken. (Erkin)