Xelq'ara kechürüm teshkilati kishilik hoquq mesiliside xitay hökümiti bilen söhbet ötküzdi

2007-03-31
Élxet
Pikir
Share
Print

Xelq'ara kechürüm teshkilati, jüme küni xitay hökümiti bilen söhbet ötküzüp, Uyghur milliy herikitining rehbiri rabiye qadir xanimning türmidiki perzentliri hemde 6 yashta xitay hökümiti teripidin qolgha élin'ghan penchen lama mesilisini otturigha qoydi.

Jüme küni washin'gton diki xitay elchixanisida élip bérilghan bu uchrishish, xelq'ara kechürüm teshkilati bilen xitay hökümiti otturisida élip bérilghan tunji resmiy uchrishish hésablinidu.

Xelq'ara kechürüm teshkilati asiya-tinch okyan bölümi mudiri tü kumar, muxbirlargha xitay elchixana xadimliri bilen élip bérilghan söhbet heqqide bergen bayanatida "söhbette biz xitay hökümitige 10 yildin béri iz-déreksiz ghayib bolghan penchen lama hemde Uyghurlarning rehbiri rabiye qadirning türmidiki perzentlirining ehwalidin qayghuruwatqanliqimizni bildürduq" dédi.

Xitay hökümiti 2006‏- yili iyun éyida Uyghur milliy herikitining rehbiri rabiye qadir xanimning qizi roshen'gül, oghulliri qahar abduréhim, ablikim abduréhim we alim abduréhimni tutup qamighan. Roshen'gül we qahar abduréhim qoyup bérildi. Alim abduréhimge 7 yilliq qamaq jazasigha höküm qilindi . Emma ablikim abduréhimning aqiwiti heqqide téxiche éniq bir melumat yuq. Xewerlerge qarighanda, tutush jeryanida hemde türmide xitay saqchiliri teripidin qattiq urulghan ablikim abduréhimning salametlik ehwali nachar iken.

Tibetliklberning diniy dahiysi dalay lam teripidin penchen lama maqamigha teyinlen'gen, 6 yashtiki gedhun niyima 1995‏- yili xitay hökümiti teripidin tutulghan. Hazir 18 yashqa kirgen pen chen lamaning qaysi yerde ikenlikini melum emes. Xitay hökümiti uning bashqa balilargha oxshash mektepke bériwatqanliqini bildürgen bolsimu, lékin hazirghiche héchqandaq xelq'ara teshkilat wekilining, dunyaning eng kichik siyasiy mehbusi dep atalghan penchen lama ni ziyaret qilishigha ruxset bermigen. (Qanat)

Pikirler (0)
Share
Toluq bet