ئامېرىكا سۇداندىكى توقۇنۇشنى ئىرقىي قىرغىنچىلىق دېدى


2004-09-10
Share

ئامېرىكا تاشقى ئىشلار مىنىستىرى كولىن پوۋېل، سۇدان ھۆكۈمىتى بىلەن سۇدان ھۆكۈمىتىنىڭ قوللىشىدىكى مۇسۇلمان خەلق ئەسكەرلىرىنىڭ غەربى سۇداننىڭ دارفۇر رايونىدىكى يەرلىك ئاھالىلارگە قارىتىلغان ھەرىكىتى ئىرقىي قىرغىنچىلىق شەكىللەندۈردى دەپ ئەيىبلىدى .

كولىن پوۋېل يۇقىرىقى سۆزنى كېڭەش پالاتاسىنىڭ تاشقى مۇناسىۋەتلەر كومېتىتىدىكى يىغىندا قىلغان سۆزىدە تەكىتلىگەن . ئۇ ، يۇقىرىقى خۇلاسىنى يېقىندا دارفۇر رايونىغا بارغان بىر تەكشۈرۈش گۇرۇپپىسى تەمىنلىگەن پاكىتلارغا ئاساسەن چىقارغانلىقىنى ئىلگىرى سۈرگەن . كولىن پوۋېل ، سۇدان ھۆكۈمىتىنى جانجاۋېد مۇسۇلمان خەلق ئەسكەرلىرىنىڭ غەربىي سۇداندىكى يەرلىك ئاھالىلەرگە قارشى ئېلىپ بارغان قىرغىنچىلىق ھەرىكىتىنى تېزگىنلەش يولىدا يېتەرلىك تىرىشچانلىق كۆرسەتمىدى دەپ ئەيىبلىگەن .

بىراق بۇ ئارىدا سۇدان ھۆكۈمىتى ئامېرىكىنىڭ غەربى سۇداندىكى يەرلىك ئاھالىلەرگە ئىرقىي قىرغىنچىلىق ئېلىپ بېرىلغانلىقى توغرىسىدىكى ئەيىپلىشىنى رەت قىلدى . سۇدان تاشقى ئىشلار مىنىستىرى مۇستاپا ئوسمان ئىسمايىل ، سايلام مەزگىلىدىكى بۇش ھۆكۈمىتى سايلىغۇچىلارنىڭ دىققىتىنى ئىچكى مەسىلىلەر ۋە ئىراق ۋەزىيىتىدىن باشقا ياققا بۇراشقا ئۇرۇنماقتا دەپ تەنقىتلىگەن . ب د ت خەۋپسىزلىك كېڭىشى پەيشەنبە كۈنى كەچتە ئامېرىكىنىڭ سۇدانغا نېفىت ئىمبارگوسى قويۇش توغرىسىدىكى تەكلىپىنى مۇزاكىرە قىلىشقا باشلىدى . سۇدان ھۆكۈمىتى ب د ت دىكى ئىتتىپاقداشلىرى ئامېرىكىنىڭ سۇندانغا ئىمبارگو يۈرگۈزۈش توغرىسىدىكى تەكلىپ لاھىيەسىگە قوشۇلمايدىغانلىقىنى بىلدۈرمەكتە .ئامېرىكا سۇداننى ب د ت نىڭ بۇ يىل 7 - ئايدا چىقارغان جانجاۋېد خەلق ئەسكەرلىرىنى قورالسىزلاندۇرۇش توغرىسىدىكى قارارىنى ئىجرا قىلمىدى دەپ ئەيىبلىمەكتە . (ئەركىن)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت