Afghanistan prézidénti talibanlar bilen söhbet élip barghanliqini étirap qildi

Afghanistan prézidénti hamid kerzey tunji qétim, afghanistanda tinchliqni tiklesh üchün taliban rehberliri bilen biwaste söhbet élip barghanliqini étirap qildi.

Prézidént kerzey jüme küni kabuldiki prézidént sariyida ötküzgen muxbirlarni kütüwélish yéghinida, "uzundin béri talibanlarning wekilliri hökümitimiz bilen söhbet élip barmaqta. Bezi taliban rehberliri bilen menu sözleshtim" dégen. Lékin u qaysi taliban rehbiri bilen söhbetleshkenliki heqqide bir nime démigen. Prézidént kerzey afghanistanda tinchliqni qaytidin tiklesh üchün pütün afghanlar bilen hetta talibanlarning rehbiri molla ömer bilen söhbetke teyyar ikenlikini bildürdi.

Afghanistandiki hakimiyiti 2001‏- yili amérikining herbiy herikiti netijiside gumran bolghan talibanlar, afghanistanda qaytidin teshkillinip, afghan armiyisi we afghanistandiki birleshme armiye qisimlirigha qarita keng kölemlik hujumlargha bashlighan. Talibanlar hetta afghanistan jenubiy we sherqiy jenubiy rayonliridiki bezi nahiyilerning kontrolluqini qolgha alghan.

Gerche talibanlar hakimiyitini gumran bolghanliqidin besh yilidin artuq bir waqit ötken bolsimu, téxiche afghanistan kop qismida hakimiyitini ornitilmighan hamid kerzey, siyasiy jehettin barghansiri qyin ehwalgha chüshüp qalmaqta. Ötken hepte afghanistanda kerzey hökümitige qarshi milliy birlik sep namida yéngi bir siyasiy öktichi heriket qurulghan. Bu heriket prézidént kerzeydin asasiy qanunni özgertishi telep qilmaqta. (Qanat)