Amérika dölet mejlisi ezasi, awam palatasi tashqi ishlar komitétining re'isi tom lantos ependi wapat boldi

Tom lantos ependi amérika dölet mejlisi awam palatasining eng gholluq ezaliridin birsi we kishilik hoquqni eng qattiq himaye qilghuchilarning bérisi bolush supiti bilen Uyghur milliy dawasi we kishilik hoquq mesilisige eng chongqur köngül bolup kéliwatqan palata ezasi.

U ilgiri Uyghur milliy herikitining rehbiri rabiye qadir xanimning xitay türmisidin azat qilinishida köp kuch chiqarghan, amérika dölet mejliside Uyghurlargha a'it élin'ghan her xil qarar layihilirini özi bash bolup teshebbus qilghan zat idi.

Tom lantos ependi 2007- yili 17- séntebr küni amérika dölet mejliside élin'ghan Uyghurlar üchün intayin muhim bolghan 497- nomurluq qararning bash teyyarlighuchisi we eng küchlük teshebbuschisi bolup, qarar layihiside, xitay hökümitidin Uyghurlar ustidin yürgüzüwatqan diniy, milly, til we medeniyet jehettiki basturush herikitini derhal toxtitish telep qilin'ghan.

Tam lantos ependining alemdin ketkinige intayin qayghurghanliqini bildürgen rabiye qadir xanim: " tam lantos ependining alemdin kétishi peqet Uyghurlar üchün zor yoqitish bolupla qalmay, belki pütün dunyadiki bizdek ézilgen milletler üchünmu zor yoqitish" dédi.

Rabiye qadir xanim yene, tom lantos ependining Uyghurlarning awazining amérika dölet mejlisige yétishide eng köp küch chiqarghan, ézilgen milletler üchün eng köp yürek qénini serp qilghan ulugh adem ikenlikini otturigha qoydi.

Tom lantos ependining wapatigha teziye bildürgen amérika prézidénti jorj bush: "u kishilik hoquq chémpiyoni idi" dédi.

Kaliforniye shitati wekili lantos ependi 1980- yilidin bashlap amérika awam palata ezasi bolup ishligen bolup, kiyin amérika awam palatasi tashqi ishlar komitétining re'islikige saylan'ghan.

Yéqinda lantos ependining rak késel ikenliki ispatlan'ghan bolup, u bügün etigen yeni 11- féwral amérika paytextige yéqin jaydiki herbiy doxturxanida 80 yéshida wapat boldi. (Jüme)