Түркмәнистанда президент сайлими үчүн беләт ташлаш ахирлашти


2007.02.11

Оттура асиядики мол нефит вә тәбиий газ записиға игә түркмәнистан җумһурийитиниң тарихидики тунҗи президент сайлими тизимлатқан адәмләрниң 99% ниң қатнишиши билән ахирлашти.

Русийә агентлиқлириниң учурлиридин қариғанда, бу қетимқи сайламда алтә адәм президентлиқ орни үчүн һәрикәт қилған болуп, йәкшәнбә күни пүтүн җумһурийәт бойичә беләт ташлаш ахирлашқан. Сайламниң нәтиҗиси дүшәнбә күни рәсмий елан қилиниду.

Учурлардин қариғанда, бу қетим сайламға чүшкән алтә адәмниң һәммиси җумһурийәтниң һакимийәт йүргүзүватқан һәм әйни вақитта сабиқ президент сәпәр мурат ниязоп тәрипидин қанунлуқ дәп бекитилгән партийидин болуп, гәрчә чәтәлләрдә пааллийәт қиливатқан өктичи партийиләр дәсләптә өзлириниң сайламға қатнишидиғанлиқини билдүргән болсиму, лекин бу қетим сайламға чүшмигән.

Әмма, өктичиләр рәһбәрлиридин бир борис шихмурадоп бу қетимқи сайламниң көплигән өлчәмгә хилап қилмишлар билән өткәнликини әскәрткән.

Көзәткүчиләрниң қаришичә, сәпәр мурат ниязоп вапат болғандин бери вақитлиқ президентлиқ вәзиписини беҗириватқан қурбаңүл бәрдимуһәммәдопниң сайламда ғәлибә қазиниш еһтималлиқиниң зор икән.

Туркмәнистан хәлқ мәслиһәти дәп аталған парламент 14 –феврал күни йеңи президентниң қәсәм берип вәзипә тапшурувелишини бекиткән.

Җумһурийәтни 21 йил идарә қилған сабиқ президент сәпәр мурат ниязоп өткән йили 12-айда вапат болғандин кейин бу йил 2-айда сайлам өткүзүш қарар қилинған иди. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.