Украинийә сайлам комитети әң ахирқи сайлам нәтиҗисини елан қилди


2004.11.24

Украинийә сайлам комитети йәрлик вақит чаршәнбә күни кәчтә әң ахирқи сайлам нәтиҗисини елан қилип, баш министир януковичниң президент сайлимида утуп чиққанлиқини җакарлиди. Буниңға өктичи намзат йошинкониң нәччә йүзмиң қоллиғучилири күчлүк наразилиқ билдүрди.

Америка бирләшмә агентлиқиниң хәвәр қилишичә, ахирқи сайлам нәтиҗиси җакарлинип узун өтмәй, америка ташқи ишлар министири колин повел украинийә президент сайлимини етирап қилмайдиғанлиқини җакарлиди. Шундақла америка тәрәп йәнә, бу сайлам нәтиҗисиниң америка-украинийә мунасивәтлиригә бивастә тәсир йәткүзидиғанлиқини агаһландурди.

Сайлам нәтиҗисигә нарази боливатқан нәччә йүз миң хәлқ аммиси һазир қишниң соғиқиға қаримастин сайлам комитети бинаси алдида йиғилип, давамлиқ түрдә һөкүмәтниң сайламда сахтилиқ қилғанлиқиға қаршилиқ билдүрмәктә. Буниң билән украинийә пайтәхти кйевдики қаршилиқ паалийити 3 күн давам қилди.

Өктичи намзат йошинко сайлам нәтиҗисидин күчлүк нарази болған болуп, у қаршилиқ көрситиватқан хәлқ аммиси алдида " мән украинийә президенти болуш сүпитим билән сөз қиливатимән" дәп билдүрди.

Украинийә һөкүмити дәсләп чиқарған сайлам нәтиҗисидә баш министир януковичниң % 3 аваз үстүнлүк билән йошинко үстидин ғәлибә қилғанлиқини җакарлиған болуп, украинийәдики мустәқил органлар вә ғәрп әллири сайламда сахтилиқ қилиш һәрикити көрүлгәнликини билдүрүп, әсли утқучиниң йошинко икәнликини илгири сүргән иди. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.