Өзбекистанда тунҗи аял президент намзати көрситилди


2007-09-30
Share

Өзбекистанда президент сайлими паалийити башланған бир һәптидин буян бир қисим партийә-гуруһлар өз намзатлирини тизимлашқа башлиди. Учурлардин қариғанда, буларниң арисида бир аял кишиму бар болуп, у өзбекистандики рәсмий тизимға елинған бәш партийиниң бири " адаләт" сотсиял-демократик партийисиниң биринчи секритари диларам ташмуһәммәдова болуп һесаблиниду.

Өзбекистан агентлиқлириниң учурлиридин қариғанда, адаләт партийиси йеқинда йиғин өткүзүп, диларам ташмуһәммәдовани 12-айниң 23-күни өткүзүлидиған президент сайлимиға чүшидиған рәсмий намзат қилип бекиткән болсиму, лекин бу йил 10-айда мәзкур партийиниң мәмликәтлик қурултийида пүтүн вәкилләрниң аваз бериши билән ахирқи қетим бекитилидикән.

Хәвәрләрдин қариғанда, бу өзбекистандики һөкүмәт етирап қилған партийиләр тәрипидин тунҗи қетим көрситилгән президент намзати болуп һесаблинидикән. Тәләп бойичә тизимға елинған башқа партийиләрму өзлириниң намзатлирини көрситиши керәк болуп, бәш партийидин бәш киши намзат супитидә риқабәткә чүшиду.

Лекин, өзбекистан тарихида тунҗи қетим аял кишиниң президент намзати болуши оттура асия райониға нисбәтән йеңилиқ болуп, бу өзбекистанлиқлар арисида түрлүк инкасларни пәйда қилмақта. Һазир, президент ислам кәримофниң мөһләт тошқан, қанун бойичә у йәнә үчинчи қетим сайлиналмайду, һазирчә униң өз намзатини көрсәткән-көрсәтмигәнлики ениқ әмәс, болсиму, бирақ өктичи тәһлилчиләр униң өз намзатини көрситиши мумкинликини пәрәз қилмақта.

Өктичиләр өзбекистанниң ичидә мәвҗут болуп туриватқан һәмдә өз намзатлирини көрситиватқан партийиләрни "чөнтәк партийилири" дәп атап, уларниң һөкүмәтниң әмрини иҗра қилидиғанлиқи, һеч қачан тәнқидий пикирләр билән мәйданға чиқмайдиғанлиқини оттуриға қоюшмақта. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт