Wéytnam hökümiti xitayning wéytnamni " ishghal qilish pilani" gha resmiy étirazda boldi

Wéytnam hökümiti xitay chong quruqluqidiki tor betlerde élan qilin'ghan xitayning wéytnamgha herbiy "ishghaliyet yürgüzüsh pilani" munasiwiti bilen xitay da'irilirige resmiy étiraz bildürgen.
Muxbirimiz erkin xewiri
2008.09.05

 "Jenubiy junggo etigenlik pochtisi géziti" ning xewer qilishiche, 8‏ - ayda xitay chong quruqluqidiki Sina.con Qatarliq chong tor betlerde xitay herbiy qisimlirining wéytnamgha qaratqan herbiy ishghaliyet pilanining tepsiliy détalliri élan qilin'ghandin kéyin, wéytnam hökümiti xitayning bir yuqiri derijilik déplomatini ikki qétim chaqirtip, xitay tor betliride élan qilin'ghan mezkur pilandin bi'aram bolghanliqini bildürgen.

Urush pilanida xitay terep 310 ming kishilik qoshunni seperwer qilidighan, deslepki besh künde wéytnamgha quruqluq, déngiz we hawadin bashqurulidighan bomba atidighan, andin wéytnamgha gu'angshi, yünnen, déngizdin bésip kirip, 31 künde wéytnamgha qaratqan ishghaliyetni tamamlash otturigha qoyulghan.

Lékin xitay tor betliride élan qilin'ghan mezkur urush pilani xitay da'irilirining resmiy meydanigha wekillik qilidighanliqi yaki buning bir herbiy tesewwurdin ibaret ikenliki tekitlenmigen. Urush pilanida mundaq déyilgen": wéytnam junggo térritoriyisige chong tehdit, junggoning tinchliqidiki tosalghu.... Shundaqla wéytnam sherqiy jenubi asiyadiki istratégiyilik yétekchi küch. Junggo sherqiy jenubi asiyani kontrolluqigha almaqchi bolsa aldi bilen wéytnam boysundurulushi kérek?"

"Jenubiy junggo etigenlik pochtisi géziti" ning eskertishiche, wéytnam tashqiy ishlar ministirliqi bayanatchisi lé dung wéytnam hökümitining xitay da'irilirige étirazda bolghanliqini étirap qilghan. Lékin xitay tashqiy ishlar ministirliqi bayanatchisi, intérnéttiki bu uchur xitay hökümitining meydanigha wekillik qilmaydighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.