Тибәтләр вә фалунгоң муритлириниң испанийидә ачқан даваси хитайниң назук йеригә тәгди

• 
  2006-06-13

Испанийидики бир тибәт кишилик һоқуқи тәшкилати билән фалунгоң тәриқити муритлириниң хитай даирилирини "ерқий тазилаш" елип бериш билән әйиблигән вә испанийә сот мәһкимисигә ачқан давасини хитай ташқий ишлар министирлиқи, испанийә фалунгоң тәриқитиниң "сияси мәқсидини" чүшинивелиши керәк, дәп әйиблиди.

Хитай ташқий ишларминистирлиқиниң баянатчиси җяң йүй, сәйшәнбә күнки мухбирларни күтивелиш йиғинида " бу тәриқәтниң җуңго һөкүмитигә қарши ойдурма вә төһмити пүтүнләй сиясий мәқсәтни чиқиш қилған " дәйду. Җяң йүйниң әскәртишичә, җуңго чәтәл дөләтлириниң униң ички ишлириға арилишишиға қарши туридикән. У, " биз испанийә һөкүмити бу тәшкилатниң җуңгоға қарши маһийитини чүшинивелишни арзу қилимиз " дәп көрсәтти.

Фалунгоң тәриқити җуңго сиясий мәслиһәт кеңишиниң рәиси җя чиңлинни бейҗиң шәһәрлик парткомниң секритари болуп вәзипә өтигән 1999 - йилдин 2003 - йилғичә фалунгоң муритлириға қарши " ерқий тазилаш" елип бериш билән әйиблигән вә испанийә сот мәһкимисигә дава ачқандин кейин, испанийә алий сот мәһкимиси әрзини көрүп чиқишни қарар қилған.

Буниң алдида тибәтләр җаң земин, ле пең вә тибәт аптоном районидики 5 нәпәр хитай әмәлдарини 1980 вә 1990 - йилларда тибәтләргә қарши "етник тазилаш "елип бериш, тән җазаси вә инсандарчилиққа қарши туруш җинайити садир қилиш билән әйиблигән вә испанийә сот мәһкимиси өткән дүшәнбә күни тибәт кишилик һоқуқи тәшкилатиниң бу әрзини көрүп чиқишни қобул қилған иди. Бейҗиң һөкүмити өткән һәптә испанийидин тибәт мәсилисини баһанә қилип, җуңгониң ички ишлириға арилашмаслиқни тәләп қилған. (Әркин)