Tibetler we falun'gong muritlirining ispaniyide achqan dawasi xitayning nazuk yérige tegdi

• 
  2006-06-13

Ispaniyidiki bir tibet kishilik hoquqi teshkilati bilen falun'gong teriqiti muritlirining xitay da'irilirini "érqiy tazilash" élip bérish bilen eyibligen we ispaniye sot mehkimisige achqan dawasini xitay tashqiy ishlar ministirliqi, ispaniye falun'gong teriqitining "siyasi meqsidini" chüshiniwélishi kérek, dep eyiblidi.

Xitay tashqiy ishlarministirliqining bayanatchisi jyang yüy, seyshenbe künki muxbirlarni kütiwélish yighinida " bu teriqetning junggo hökümitige qarshi oydurma we töhmiti pütünley siyasiy meqsetni chiqish qilghan " deydu. Jyang yüyning eskertishiche, junggo chet'el döletlirining uning ichki ishlirigha arilishishigha qarshi turidiken. U, " biz ispaniye hökümiti bu teshkilatning junggogha qarshi mahiyitini chüshiniwélishni arzu qilimiz " dep körsetti.

Falun'gong teriqiti junggo siyasiy meslihet kéngishining re'isi jya chinglinni béyjing sheherlik partkomning sékritari bolup wezipe ötigen 1999 - yildin 2003 - yilghiche falun'gong muritlirigha qarshi " érqiy tazilash" élip bérish bilen eyibligen we ispaniye sot mehkimisige dawa achqandin kéyin, ispaniye aliy sot mehkimisi erzini körüp chiqishni qarar qilghan.

Buning aldida tibetler jang zémin, lé péng we tibet aptonom rayonidiki 5 neper xitay emeldarini 1980 we 1990 - yillarda tibetlerge qarshi "étnik tazilash "élip bérish, ten jazasi we insandarchiliqqa qarshi turush jinayiti sadir qilish bilen eyibligen we ispaniye sot mehkimisi ötken düshenbe küni tibet kishilik hoquqi teshkilatining bu erzini körüp chiqishni qobul qilghan idi. Béyjing hökümiti ötken hepte ispaniyidin tibet mesilisini bahane qilip, junggoning ichki ishlirigha arilashmasliqni telep qilghan. (Erkin)