Ху җинтавниң африқидики зиярити тәнқидкә учримақта


2007.02.05
Share on WhatsApp
Share on WhatsApp

Африқа дөләтлиригә қаратқан зияритини давамлаштуруватқан хитай дөләт рәиси хуҗинтав, дүшәнбә күни замбийидин намибийигә келип намибийиниң президенти һефикепонйә поһамба билән икки дөләт оттурисидики иқтисадий вә сиясий мунасивәтләрни тәрәққи қилдуруш мәсилисини музакирә қилди.

Намибийә билән хитай оттурисида иқтисадий, сиясий, маарип вә мудапиә саһәлиридә йеқин һәмкарлиқ мәвҗут болуп, ху җинтавниң бу қетимқи зиярити билән хитай һөкүмити бу мунасивәтләрни техиму юқири пәллигә көтүрүшни мәқсәт қилмақта.

Гәрчә хитай һөкүмити африқа дөләтлиригә мәбләғ селиш вә африқа дөләтлирини төвән өсүмлүк вә узун муддәтлик қәрз билән тәминләп, уларниң иқтисадий җәһәттин тәрәққиятиға һәссә қошуватқанлиқини тәкитләватқан болсиму, әмма хитай һөкүмитиниң африқа дөләтлири билән мунасивәтлирини тәрәққий қилдурушта кишилик һоқуқ мәсилисини қилчә нәзәр гә алмиғанлиқи ғәрб дөләтлири вә кишилик һоқуқ тәшкилатлириниң тәнқидигә учримақта.

Ғәрб дөләтлири вә хәлқара кишилик һоқуқ тәшкилатлири хитай һөкүмитиниң болупму судан вә замбийә қатарлиқ африқидики кишилик һоқуқни әң көп дәпсәндә қиливатқан дөләтләр билән йеқин мунасивәт орнитиши вә хәлқара сәһнидә уларни қоллишини қаттиқ тәнқид қилмақта.

Пәқәт ғәб дөләтлирила әмәс, африқидики сода даирилири вә әмгәкчилири бирдәк хитай һөкүмитиниң африқа дөләтлиригә қаратқан сияситини қаттиқ тәнқид қилип, хитай һөкүмитини, африқа дөләтлириниң тәбий байлиқлирини булаң ‏- талаш қилип, африқа базарлирини әрзан хитай таварлири билән толдуруш арқилиқ, африқида йеңи мустәмликичилик сиясити елип бериватиду, дәп әйиблимәктә. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.