Америка вә хитай һәрбий саһәси қизиқ линийилик телефон алақиси келишими түзди

5- Ноябир дүшәнбә күни америка билән хитай тәрәп арисида елип бериливатқан һәрбий сөһбәт җәрянида, икки тәрәп арисида дөләт мудапиәси һәмкарлиқини күчәйтиш җәһәтләрдә муәййән илгириләшләр һасил қилинған болсиму, әмма хитайниң һәрбий һазирлиқлар кеңәймичилики мәсилисидә пикир бирлики һасил қилинмиди.

Хитай дөләт мудапиә министири сав гуаңчүән билән бир саәттин артуқ сөһбәт елип барған америка дөләт мудапиә министири роберт гейтс, сөһбәт җәрянида хитайниң һәрбий һазирлиқлар кеңәймичиликидики хупиянә қилмишларни оттуриға қойғанлиқини һәмдә хәлқара җәмийәтни хатирҗәм қилиш үчүн хитайниң һәрбий тәрәққият җәһәттә очуқ ‏- ашкара болуши керәкликини тәкитлигәнликини билдүрди.

Гейтс әпәндиниң билдүрүшичә, хитай дөләт мудапиә министири сав гуаңчүән хитайниң һәрбий хираҗитини ашуруштики сәвәблирини ақлиған болсиму, әмма америка көңүл болуп келиватқан, хитай бу йил январда елип барған сүний һәмраһни башқурулидиған бомбида етип чүшүрүш қилмишиға нисбәтән инкас қайтурмиған болуп, гейтс әпәнди " мән бизниң бу җәһәттики қаришимизни оттуриға қойған болсамму, әмма илгирилигән җавабқа еришәлмидим" деди.

Бу икки тәрәп һәрбий вәкиллириниң билдүрүшичә, америка вә хитай җиддий кризисларға ортақ инкас қайтуруш җәһәттики дөләт мудапиә һәмкарлиқини күчәйтиш үчүн, қизиқ линийилик телефон алақиси шәкилләндүрүш җәһәттә келишим һасил қилған.

Америка вә хитай арисида дөләт мудапиәси қизиқ линийилик телефон алақиси орнитиш тәклипини америка узундин буян тәкитләп келиватқан болуп, шинхуа ахбарат агентлиқида көрситилишичә, мәзкур қизиқ линийә алақиси келишими америка вә хитай арисида һасил қилинған шу хилдики тунҗи келишим икән.

Икки тәрәп йәнә, иран ядро мәсилиси вә тәйвән мәсилиси хусусида сөһбәт елип барған болуп, роберт гейтс җәнубий корийигә қарап йолға чиқиштин илгири, сәйшәнбә күни хитай рәиси ху җинтав билән көрүшиду. (Җүмә)