Amérika we xitay herbiy sahesi qiziq liniyilik téléfon alaqisi kélishimi tüzdi

5- Noyabir düshenbe küni amérika bilen xitay terep arisida élip bériliwatqan herbiy söhbet jeryanida, ikki terep arisida dölet mudapi'esi hemkarliqini kücheytish jehetlerde mu'eyyen ilgirileshler hasil qilin'ghan bolsimu, emma xitayning herbiy hazirliqlar kéngeymichiliki mesiliside pikir birliki hasil qilinmidi.

Xitay dölet mudapi'e ministiri saw gu'angchüen bilen bir sa'ettin artuq söhbet élip barghan amérika dölet mudapi'e ministiri robért géyts, söhbet jeryanida xitayning herbiy hazirliqlar kéngeymichilikidiki xupiyane qilmishlarni otturigha qoyghanliqini hemde xelq'ara jem'iyetni xatirjem qilish üchün xitayning herbiy tereqqiyat jehette ochuq ‏- ashkara bolushi kéreklikini tekitligenlikini bildürdi.

Géyts ependining bildürüshiche, xitay dölet mudapi'e ministiri saw gu'angchüen xitayning herbiy xirajitini ashurushtiki seweblirini aqlighan bolsimu, emma amérika köngül bolup kéliwatqan, xitay bu yil yanwarda élip barghan sün'iy hemrahni bashqurulidighan bombida étip chüshürüsh qilmishigha nisbeten inkas qayturmighan bolup, géyts ependi " men bizning bu jehettiki qarishimizni otturigha qoyghan bolsammu, emma ilgiriligen jawabqa érishelmidim" dédi.

Bu ikki terep herbiy wekillirining bildürüshiche, amérika we xitay jiddiy krizislargha ortaq inkas qayturush jehettiki dölet mudapi'e hemkarliqini kücheytish üchün, qiziq liniyilik téléfon alaqisi shekillendürüsh jehette kélishim hasil qilghan.

Amérika we xitay arisida dölet mudapi'esi qiziq liniyilik téléfon alaqisi ornitish teklipini amérika uzundin buyan tekitlep kéliwatqan bolup, shinxu'a axbarat agéntliqida körsitilishiche, mezkur qiziq liniye alaqisi kélishimi amérika we xitay arisida hasil qilin'ghan shu xildiki tunji kélishim iken.

Ikki terep yene, iran yadro mesilisi we teywen mesilisi xususida söhbet élip barghan bolup, robért géyts jenubiy koriyige qarap yolgha chiqishtin ilgiri, seyshenbe küni xitay re'isi xu jintaw bilen körüshidu. (Jüme)