Xitay bilen hindistan rehberliri yéngi déhlida bir qatar kélishimlerge qol qoydi

• 
  2005-04-11

Xitay bilen hindistanning bash ministirliri hindistanning paytexti yéngi déhlida chégra meslisini öz ichige alghan bir qatar kélishimlerge qol qoydi. Melum bolushiche , ikki döletning chégra ixtilapliri mezkur kélishimdiki siyasiy yétekchi idiye asasida bir terep qilinidiken.

En'giliye b b s radi'o- téléwiziye shirkitining 11 - april küni bergen xewiride körsitilishiche, hindistan bash ministiri sing bilen xitayning bash ministiri wén jyabaw birlikte qol qoyghan bu kélishim, dunya boyiche nopusi eng köp bolghan we iqtisadiy téz sür'ette éshiwatqan bu ikki dölet munasiwitining tereqqiyati üchün yol échip béridiken.

1962 -Yili chégra ixtilapliri sewebidin, ikki dölet otturisida qoralliq toqunush yüz bergen idi.

Ikki döletning, chégra mesililirini bir terep qilish alahide wekiller ömiki 10 - april küni hindistan paytexti yéngi déhlida 5 - nöwetlik yighinini chaqirdi. Shinxu'a agéntliqi bu heqte xewer bérip, ikki terepning dostane we hemkarliq keypiyati ichide uchriship, chégra mesilisini bir terep qilish üchün birlikke kelgenlikini tekitligen .

Fransiye agéntliqining xewer qilishiche, hindistan dölet xadimliri mutexessislerning ikki dölet chégra siziqini ayrish üchün deslepki tekshürüshni élip barghanliqini bildürgen.

Xitay bilen hindistan, ikki döletning chégra mesilisini bir terep qilish alahide wekiller ömikining kéler qétimliq uchrishishining qeyerde élip bérilidighanliqi heqqide éniq ipade bildürmigen bolup, shinxu'a agéntliqining bildürüshiche, buningdin kéyinki söhbet " ikki terep muwapiq tapqanda béyjingde ötküzülüshini mumkin iken" . (Eqide)