Америка пуқралири иран билән хитайни әң хәтәрлик тәһдит дәп қарайду


2007.11.01

Америкидики бир хәлқ райини синаш орниниң йеқинда елип барған тәкшүрүш нәтиҗисидин мәлум болушичә, америка пуқралири иранни нөвәттики әң чоң тәһдит , хитай билән шималий корийини ирандин қалса әң хәтәрлик тәһдит дәп һесаблиған. Лекин америкиниң өзини әң хәтәрлик тәһдит, дәп қарайдиғанлар рай синашқа қатнашқучиларниң %8 ни игилигән.

Америка ярдәмчи ташқи ишлар министири николас бурнес өткән һәптә хитай билән русийини иранни қоллаватиду, дәп тәнқидләп, хитайни иранға мәбләғ салмаслиққа, русийини иранға қорал - ярақ сетип бәрмәсликкә чақирған. Лекин хитай билән русийә иран мәсилисидә америка билән тиркишишни давамлаштурмақта. Америка тәрәпниң ашкарилишичә, пәйшәнбә күни русийә билән хитай хәвпсизлик кеңишидики рәт қилиш һоқуқини қоллинип, б д т ниң иранға имбарго қоюш қарарини хәвпсизлик кеңишидә оңушсизлиққа учратқан.

Америка рәһбәрлири иранниң ядро қоралларға игә болушиға һәргиз сүкүт қилип турмайдиғанлиқини агаһландуруп, гези кәлсә һәрбий һәрикәт қоллинидиғанлиқини илгири сүрмәктә. Рай синаш нәтиҗисигә қариғанда %35 адәм иранни америка үчүн әң хәтәрлик тәһдит дәп қариған болса, рай синашқа қатнашқучиларниң %19 хитайни, %10 шималий корийәни әң хәтәрлик тәһдит дәп қариған. Бу америка хәлқи ичидә буш һөкүмитиниң иранға имбарго қоюш қарарини қоллайдиғанларниң көпийиватқанлиқидин дирәк беридикән.

Президент буш өткән һәптә иранниң "террорчиларни қоллиғанлиқи " вә ядро қоралларни тәрәққи қилдуруватқанлиқи түпәйли иранға бир тәрәплимилик имбарго қарари елан қилип, 4 иран банкиси билән иран ислам инқилаби қоғдиғучи қисиминиң қуддус дивизийисигә имбарго қойған. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.