Amérika tewqelikidiki xitay inzhénir jasusluq qilghanliqini iqrar qildi

Amérika tewelikidiki xitay inzhénér méng shawdung, amérika soda mexpiyetlikini oghrilighanliqi we xitaygha satmaqchi bolghanliqini iqrar qildi. Amérika teptish da'irilirining aldinqi küni ashkarilishiche, méng shawdung kaliforniyining san - joyés rayonidiki bir fédéral sot mehkimiside jinayitini iqrar qilip, amérikining bir tetqiqat shirkiti teripidin yasalghan herbiy meshqqe da'ir yumshaq détal özükini xitay déngiz armiyisining bir tetqiqat ornigha satmaqchi bolghanliqini étirap qilghan.

Méng shawdung, amérika teptish da'iriliri teripidin amérikining soda mexpiyetlikini oghrilash we bu sewebtin 36 xil jinayet sadir qilish bilen eyiblen'gen. Xewerlerge qarighanda méng shawdung esli béyjingda tughulghan bolup, kanada puqraliqini alghan we kaliforniyidiki bir yuqiri téxnikiliq shirkette xizmet qilatti. U 2004- yili amérika shirkitidin herbiy meshq toghrisidiki yumshaq détal özükini oghrilighanliqi bayqalghandin kéyin, amérika fédéral tekshürüsh idarisi xadimliri teripidin qolgha élin'ghan. Kélishim buyiche u jinayitini iqrar qilghanliqi üchün bérilidighan jaza qisqartilip, 2 yilliq qamaq jazasi we bir yérim milyon dollar jerimane tölüshi mumkin.

Amérika hökümet emeldarlirining eskertishiche, kaliforniyidiki silikon yuqiri téxnika wadisi xitay we iran'gha oxshash döletler amérikidin iqtisadi we herbiy téxnika oghrilaydighan jasusluq pa'aliyetlerning böshüki bolup qalmaqta. Yéqinda döletlik axbarat ishxanisining yuqiri derijilik bir emeldari dölet mejliside guwahliqtin ötüp, xitay jasuslirining amérikidiki pa'aliyiti amérika bixeterlikige tesir yetküzidighan ehwalgha bérip qalghanliqini agahlandurghan idi. Lékin xitay hökümiti xitay jasuslirining amérikida pa'aliyet élip bériwatqanliqini ret qilmaqta. (Erkin)