خىتاي، پاكىستان ھۆكۈمىتىدىن ئۇيغۇر پائالىيەتچىلەرنى خىتايغا تاپشۇرۇپ بېرىشىنى تەلەپ قىلدى


2007.05.17
Share on WhatsApp
Share on WhatsApp

خىتاي پاكىستان ھۆكۈمىتىدىن پاكىستاننىڭ ئافغانىستان چېگرىسىدىكى قەبىلىلەر رايونىدا يوشۇرۇنغان 20 دىن ئارتۇق ئۇيغۇر پائالىيەتچىنى خىتايغا تاپشۇرۇپ بېرىشىنى تەلەپ قىلغان.

ھىندىستاندا چىقىدىغان كۈندىلىك ۋاقىت گېزىتىنىڭ، پاكىستان تاشقى ئىشلار مىنستىرلىقىنىڭ ئىسمىنى ئاشكارىلاشنى خالىمىغان بەزى خادىملىرىنىڭ سۆزلىرىنى نەقىل كەلتۈرۈشىچە، خىتاي ھۆكۈمىتى، "پاكىستان ھۆكۈمىتى ئۇيغۇر مىلىتانلارنى تۇتۇپ خىتايغا تاپشۇرۇپ بېرىشى كېرەك" دېگەن.

خەۋەردە ئېيتىلىشىچە، خىتاي ھۆكۈمىتى مۇستەقىل بىر شەرقىي تۈركىستان دۆلىتى قۇرۇش ئۈچۈن كۈرەش قىلىۋاتقان، شەرقىي تۈركىستان ئىسلامىي ھەرىكىتىنىڭ 20 دىن ئارتۇق ئەزاسىنىڭ پاكىستان قەبىلىلەر رايونىدا پائالىيىتى داۋاملاشتۇرۇۋاتقانلىقىنى بىلدۈرمەكتە.

گەرچە، پاكىستان تاشقى ئىشلار مىنسىتىرلىقىنىڭ باياناتچىسى تەسرىن ئەسلەم، خىتاي ھۆكۈمىتىنىڭ بۇنداق بىر تەلىپىدىن خەۋەرسىز ئىكەنلىكىنى بىلدۈرگەن بولسىمۇ، ئەمما پاكىستان ھۆكۈمىتى خەلقئارا كىشىلىك ھوقۇق تەشكىلاتلىرىنىڭ قارشى چىقىشىغا قارىماي ئۆتمۈشتە ئىسمائىل سەمەت، مۇھەممەت توختى قاتارلىق نۇرغۇنلىغان ئۇيغۇر پائالىيەتچىسىنى خىتايغا قايتۇرۇپ بەرگەن. خىتاي ھۆكۈمىتى بۇ ئۇيغۇر پائالىيەتچىلىرىنىڭ بەزىلىرىنى ئۆلۈم جازاسىغا ھۆكۈم قىلىپ، ئېتىپ ئۆلتۈرگەن بەزىلىرىنى بولسا مۇددەتسىز قاماق جازاسىغا ھۆكۈم قىلغان.

خىتاي ھۆكۈمىتىنىڭ پاكسىتان ھۆكۈمىتى تەرىپىدىن خىتايغا قايتۇرۇپ بېرىلگەن ئىسمائىل سەمەتنى ئۆلۈم جازاسىغا ھۆكۈم قىلىپ، ھۆكۈمنى ئىجرا قىلىشى ھەمدە مۇھەممەت توختىنى مۇددەتسىز قاماق جازاسىغا ھۆكۈم قىلىشى خەلقئارا جامائەتنىڭ ۋە ئۇيغۇر تەشكىلاتلىرىنىڭ قاتتىق نارازىلىقىنى قوزغىغان.(ئەقىدە)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت