Җоңго һизбуллаға қорал - ярақ експорт қилғанлиқини инкар қилди

• 
  2006-08-22

Җуңгониң оттура -шәрқтики алаһидә вәкили сүн биган, җоңго һизбуллаға һечқачан қорал - ярақ експорт қилип бақмиди дәп көрсәтти. Лекин у, хитайда ишләнгән қоралларни һизбуллаға 3 - бир тәрәпниң бәргән болуш мүмкинчиликини чәткә қақмиди.

Хәлқара мәтбуатлар исраилийә - ливан уруши җәрянида һизбулланиң қолидики қоралларниң ирандин кәлгәнлики, лекин җоңгода ишләпчиқирилғанлиқини хәвәр қилған. Сүн биган сәйшәнбә күни бейҗиңда мухбирларға "мениңчә ливан - исраилийә уруш мәйданида җоңго қораллириниң ишлитилгәнлики һәққидики хәвәр вә учурлар тоғра әмәс," дәп тәкитлигән вә "җоңго һич бир тәшкилат, гуруһ вә сияси партийини қорал - ярақлар билән тәминләп бақмиди," дәйду.

Һизбулланиң 14 - июл күни исраилийә уруш кемисигә атқан башқурулидиған бомбисида 4 исраилийә деңиз әскири өлди. Сүн биган "җоңгониң сиясити бойичә бизниң һизбуллаға башқурулидиған бомба сетишимиз мумкин әмәс," дегән болсиму, лекин исраилийә армийиси 802 – C бәлгилик башқурулидиған бомбиниң хитай техникиси билән ясалғанлиқини җакарлиған.

Сүн биган, қоралларниң 3 - бир дөләттин һизбуллаға експорт қилинған болуши мумкинчиликини чәткә қақмиди. Лекин хитайлар бу вәқә үстидин һазирғичә тәкшүрүп елип бармиған.