Хитай билән түркмәнистан уйғурларға қарши келишим түзди


2006-04-04
Share

Түркмәнистан президенти сәпәр мурат ниязоф бейҗиңни зиярәт қиливатқан бир чағда, хитай һөкүмити билән түркмәнистан уйғур мустәқиллиқини тәләп қилидиған шәрқий түркистан күчлиригә қарши келишим имзалиди. Хитай мәтбуатлири бу келишимни түркмәнистан билән җуңго террорлуққа қарши бирликтә күрәш қилишкә қошулди, дәп хәвәр қилған.

Шинхуа ахбарат агентлиқиниң әскәртишичә, ниязоф билән ху җинтав арисида имзаланған келишимдә " икки дөләт шәрқий түркистан бөлгүнчи күчлиригә қарши күрәшни террорлуққа қарши дунявий күрәшниң бир қисими, дәп қарайду," дийилгән вә " террорлуқ, бөлгүнчилик вә диний әсәбийликни районниң бихәтәрлики вә муқимлиқиға келиватқан зор тәһдит амили һесаблайду," дәп тәкитлигән.

Хәлқара кишилик һоқуқ тәшкилатлири хитай даирилирини хәлқара террорлуққа қарши күрәшни баһанә қилип, уйғурларниң кишилик һоқуқини дәпсәндә қилиш вә өз көз қаришини тинч йоллар билән ипадә қилған уйғур өктичи затлирини бастуруш билән әйиблимәктә иди.

Ройтерс ахбарат агентлиқиниң тәкитлишичә, бейҗиң һөкүмити хитай енергийә еһтияҗиниң 30 % ни тәминләйдиған уйғур аптоном районидамуқимлиқниң капаләткә игә болушини үмид қилмақта.

Ниязоф билән ху җинтав дөшәнбә күни хитайға түркмән тәбий газини сетиш вә хитай - түркмәнистан арисида тәбий газ турубиси ятқузуш келишими имзалиған. " Тәрәпсиз түркмәнистан" гезити, тәбий газ турубисиниң 2009 - йили ясилидиғанлиқини хәвәр қилди. Хитай ташқий ишлар министирлиқи баянатчиси җйәнчав, газ турубиси келишими имзаланғанлиқини тоғрилиған болсиму, лекин келишимниң мәзмуни тоғрисида учур бәрмигән. Ниязофниң хитайда елип бериватқан зиярити йәкшәнбә башланди. У, кейинки қәдәмдә хитайниң шаңхәй вә җеҗяң қатарлиқ шәһәр вә өлкилирини зиярәт қилиду. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт