ياسىكۇنى بۇزرۇكگاھىنى زىيارەت قىلىش مەسىلىسى خىتاي - ياپونىيە مۇناسىۋىتىدە كۆڭۈلسىزلىك ياراتتى
2005.05.24
خىتاي دۆلەت كابىنتىنىڭ مۇئاۋىن باش مىنىستىرى ۋۇ يىنىڭ ياپونىيىدىكى زىيارىتىنى يېرىم يولدا توختىتىپ مۇددەتتىن بۇرۇن دۆلىتىگە قايتىش ھەرىكىتى، خىتاي ياپونىيە مۇناسىۋىتىدە كۆڭۈلسىزلىك ياراتتى.
ۋۇ يى، ئالدىنقى كۈنى ياپونىيە باش مىنىستىرى كويزۇمى بىلەن كۆرۈشۈش پىلانىنى تۇيۇقسىز بىكار قىلىپ، دۆلىتىگە قايتقان. خىتاي تاشقى ئىشلار مىنىستىرلىقى سەيشەنبە ياپونىيە ئەمەلدارلىرىنى خىتاي - ياپونىيە مۇناسىۋىتىگە پايدىسىز سۆزلەرنى قىلىش بىلەن ئەيىپلىدى. ياپونىيە تاشقى ئىشلار مىنىستىرى ماچىمۇرا، ۋۇ يىنىڭ كويزۇمى بىلەن ئۇچرىشىش پىلانىنى بىكار قىلىش نازاكەتسىزلىكى ئۈچۈن ئەپۇ سورىمىغانلىقىنى ئەيىپلىگەن.
خىتاي تاشقى ئىشلار مىنىستىرلىقىنىڭ باياناتچىسى كوڭ چۈئەن، " مۇئاۋىن باش مىنىستىر ۋۇ يى ياپونىيىنى زىيارەت قىلىۋاتقاندا، ياپونىيە رەھبەرلىرىنىڭ ياسىكۇنى بۇزرۇكگاھىنى زىيارەت قىلىش توغرىسىدا خىتاي - ياپونىيە مۇناسىۋىتىگە پايدىسىز سۆزلەرنى قىلىش، جوڭگو قاتارلىق دۆلەتلەرنىڭ غەزىپىنى قوزغىدى،" دەپ كۆرسەتتى.
ئەسلىدىكى پىلاندا ۋۇيى دۈشەنبە كۈنى كويزۇمى بىلەن ئۇچۇرىشاتتى. ياپونىيە تەرەپنىڭ ئاشكارىلىشىچە، ئۇچۇرۇشىشنى بىكار قىلىش تەلىپىنى خىتايلار ئوتتۇرىغا قويغان. بۇنىڭ ئالدىدا يەكشەنبە كۈنى خىتاي دۆلەت رەئىسى خۇ جىنتاۋ، ياپونىيىدە ھاكىمىيەت بېشىدىكى پارتىيىنىڭ ۋەكىللەر ئۆمىكىنى قوبۇل قىلىپ، ياپونىيە ئەمەلدارلىرىنىڭ ياسىكۇنى بۇزرۇكگاھىنى زىيارەت قىلىشىنى تەنقىدلىگەن ئىدى.
ياپونىيە تەرەپ ۋۇ يىنىڭ ھەرىكىتىگە چۈشەنچە بېرىشنى تەلەپ قىلغان. خىتاي ھۆكۈمىتى ۋۇ يىنىڭ كۆرۈشىشنى بىكار قىلىشىغا " دۆلەت ئىچىدىكى ۋەزىپىسى" سەۋەپ بولغانلىقىنى بىلدۈرگەنىدى. (ئەركىن)
مۇناسىۋەتلىك ماقالىلار
- خىتاي ئەمەلدارى ۋۇ يى ياپونىيىدىكى زىيارىتىنى تۇيۇقسىز ئاخىرلاشتۇردى
- خىتاي- ياپونىيە تاشقى ئىشلار مىنىستىرى ئىككى تەرەپ ئىختىلابىنى مۇزاكىرە قىلدى
- كويزۇمى ياۋروپا ئىتتىپاقىنى خىتايغا يۈرگۈزگەن قورال - ياراق ئىمبارگوسىنى ساقلاپ قېلىشقا ئۈندىدى
- ياپونىيىنىڭ سابىق باش مىنىستىرى، خىتاي بىلەن "مەرتلەر كېلىشىمى" ئىمزالىغانلىقىنى رەت قىلدى
- ياپونىيە تاشقى ئىشلار مىنىستىرى خىتاينى ئەيىبلىدى