Myunxéndiki Uyghur yashliri "Xitay mallirini bayqut qilish", "Mejburiy emgekke qarshi turush" herikiti bashlighan

Ixtiyariy muxbirimiz ekrem
2020-08-21
Share

Uyghur yashliri myunxén sheher merkizide namayish ötküzüp "Mejburiy emgekke qarshi turush", "Xitay mallirini bayqut qilish" chaqiriqlirida bolghan.

19-Awghust myunxén shehiridiki bir bölük Uyghur yash oghul-qizlirining her xil teshwiqat taxtilirini kötürüp, sheherning awat soda merkizide namayish qiliwatqan sin körünüshliri ijtima'iy taratqularning qiziq témisigha aylan'ghan idi. Ular kötürüwalghan taxtaylargha "Made in china-mejburiy emgek", "3 Milyon Uyghur jaza lagérlirida", "Xitay, Uyghurlargha élip bériwatqan irqiy qirghinchiliqni toxtat!" dégendek sho'arlar yézilghan bolup, ular etraptiki yoluchilargha gérmanche, engilizche tillarda néme üchün bundaq bir namayishni uyushturghanliqi toghrisida chüshenche berdi. Uyghurlarning nöwettiki éghir weziyitini anglatti. Sani anche köp bolmisimu, sheherning soda merkizide xitayning toqulma buyumlirini we éléktoronluq üskünilirini sétiwatqan oxshash bolmighan markilardiki dukanlarning aldida ikkidin, üchtin bolup namayish qiliwatqan bu yashlarning herikiti diqqet qozghidi.

Xitayning "Mejburiy emgek" siyasitige qarshi sadalar dunya miqyasida barghanséri ewj éliwatqan bir chaghda xitay bilen bolghan tijariy munasiwetni kishilik hoquqtin üstün orun'gha qoyup kéliwatqan, jaza lagérlirigha qarita tüzük ünini chiqarmaywatqan démokratik gérmaniyening myunxén shehiride ötküzülgen bu namayishning etraptiki ammining diqqitini jelp qilishi tebi'iy idi. Uzundin buyan axbarat sahesi gérmaniye hökümitini xitay bilen bolghan siyasitini qaytidin oylinishqa, gérmaniye soda guruhlirini xitay bilen bolghan tijariy alaqilarda Uyghurlargha munasiwetlik "Mejburiy emgek" ke sel qarimasliqqa, kishilik hoquqni depsende qilmasliqqa agahlandurup kelgen idi. Gérmaniyediki bir qisim parlamént ezaliri we köpligen kishilik hoquq organliri bu mesilini hetta parlaméntqa qeder élip kirgen idi.

Biz sürüshtürüsh arqiliq bu qétimqi namayishni myunxén shehiridiki bir bölük Uyghur yashlarning d u q ning meslihetini alghandin kéyin özlükidin teshkilligenlikini bilduq. Bu namayishni uyushturghan yashlardin iliyar sidiqning bildürüshiche, xitay mallirini bayqut qilish sadasini yenimu kücheytish, xitay bilen soda alaqisi bolghan gérmaniye shirketlirige bésim ishlitish, xitayning türlük mallirini sétiwatqan dukanlarni "Mejburiy emgek" toghrisida agahlandurush bu qétimqi namayishning asasliq meqsiti iken.

Bu namayishqa ishtirak qilghan yash qizlardin d u q ning programma yétekchisi zumret Uyghurning bildürüshiche, namayish yerlik ahalining küchlük diqqitini tartqan we ularning qizghin qollishigha, hésdashliqigha érishken.

Myunxén yashliri 19-awghust bu namayishni bashlap uzun ötmeyla d u q re'isi dolqun eysa ependi neq meydan'gha bérip, ulargha ilham bergen, yashlarning bu jasaretlik qozghilishini qizghin qollaydighanliqini ipade qilghan, bu heriketning dawamlishishigha tilekdashliq bildürgen.

Bu qétimqi namayishqa qatnashqan yashlarning bayan qilishiche, bularning xitaygha qarshi bu pa'aliyetliri uzun'ghiche dawamlishidiken we ularning kölimi barghanséri kéngiyidiken. Aldimizdiki künlerde yene gérmaniyediki xitay bilen tijariy alaqisi bolghan chong soda guruhlirining xizmet binalirining aldidimu namayishlar teshkilleydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.