Xitayning korona wirusi heqqidiki bayanlarni kontrol qilishqa urunuwatqanliqi melum

Muxbirimiz jüme
2020-04-12
Élxet
Pikir
Share
Print
"Wal strét zhurnili géziti" de élan qilin'ghan xitayning ijtima'iy médiya uchurliri arqiliq korona wirusi heqqidiki bayan-sherhlerni kontrol qilishqa urunuwatqanliqi heqqidiki xewer. 2020-Yili 10-aprél.
"Wal strét zhurnili géziti" de élan qilin'ghan xitayning ijtima'iy médiya uchurliri arqiliq korona wirusi heqqidiki bayan-sherhlerni kontrol qilishqa urunuwatqanliqi heqqidiki xewer. 2020-Yili 10-aprél.
Photo: RFA

Xitayning ijtima'iy médiya uchurliri arqiliq korona wirusi heqqidiki bayan-sherhlerni kontrol qilishqa urunuwatqanliqi melum.

"Wal strét zhurnili géziti" ning xewer qilishiche, xitay da'iriliri rusiyening saxta uchur tarqitish taktikisigha oxshap kétidighan amérikidiki ijtima'iy médiya betliridin élanlarni sétiwélish usulidin paydilinip korona wirusigha qayturulghan dunyawi inkaslarni qayta sherhleshke urunmaqta iken.

Xitayning urunushliri féysbuktin dölet igidarchiliqidiki in'gliz tilliq axbaratlar üchün élan sétiwélip özining xewirini bazargha sélishi, hetta bezide amérikining mezkur wirusqa qayturghan inkasini nachar qilip körsitish qatarliqlarni öz ichige alidiken.

"Xatiriligen kelgüsi" namliq tor bixeterliki tetqiqat jem'iyitining doklatigha qarighanda, bu yil féwraldin, martning béshigha kelgüche xitay hökümiti igidarchiliqidiki axbarat organliri amérikidiki ijtima'iy axbaratlargha künige 3 ming 300 parche uchur chaplighan. Bu xitay axbaratining adettiki uchur chaplash nisbitidin 3 hesse yuqiri bolghan.

Bular asasen féysbuk we twittér torlirida alahide aktip bolghan.

Xewerde neqil élip körsitishiche, "Stanford intérnét resetxanisi" namliq tetqiqat ornidiki tetqiqatchi wanéssa moltér xitayning 2018-yilidin buyan siyasiy élan tarqitish üchün féysbuktin 200 din artuq élan orni sétiwalghanliqini, bularning mutleq köp qismining ötken ikki ay jeryanida sétiwélin'ghanliqini bildürgen.

Xitayning wuxen shehiridin tarqalghan "Wuxen korona wirusi" dunyawi wabagha aylinip jiddiy krizis peyda qilghandin kéyin, xitay mezkur wirus mesilisidiki mes'uliyetni üstige almighan. Hetta xitay tashqi ishlar ministirliqining bayanatchisi jaw lijiyen bir twittér uchurida mezkur wirusning amérika eskerliri teripidin tarqitilghanliqini teshwiq qilghan idi.

"Yéngi korona wirusi" dep atiliwatqan öpke yallughisiman bu wirus nöwette pütün dunya miqyasigha yamrap, 1 milyon 800 minggha yéqin ademni yuqumlandurghan we 100 mingdin artuq ademning jénigha zamin bolghan idi.

Toluq bet