Xitay hökümitining chet ellerdiki bir qisim Uyghurlarni öz teshwiqatigha sélishi jiddiy inkas qozghidi

Muxbirimiz méhriban
2021-06-21
Share
Xitay hökümitining chet ellerdiki bir qisim Uyghurlarni öz teshwiqatigha sélishi jiddiy inkas qozghidi "Xitay kompartyesining 100 yilliqini tebriklesh sen'et pa'aliyiti" ge qatnashturulup xitay kompartyesini medhiyeleydighan qizil naxsha éytquzulghan Uyghur ösmürning biri. 2021-Yili iyun.
Social Media

Xitay kommunist hökümiti qurulghandin buyan, özining teshwiqat wastiliridin paydillinip, dölet ichidiki xelqning naraziliqi bilen xelq'ara jem'iyetning eyibleshlirini awamdin yoshurup kelgen idi.

Amérika qatarliq yette dölet "Xitay hökümiti Uyghurlargha érqiy qirghinchiliq qildi" dep jakarlap, Uyghurlar uchrawatqan "Irqiy qirghinchiliq" ta jawabarliqi bar bolghan xitay emeldarliri, xitay hökümet organliri, shundaqla Uyghur diyaridiki mejburiy emgek bilen chétishliqi bar xitay shirketlirige qarita jaza tedbirliri qollinilishqa bashlidi. Netijide xitay hökümitimu her xil yollar arqiliq özining Uyghurlargha qaratqan "Irqiy qirghinchiliq" siyasitini aqlash teshwiqatini kücheytti.

Melum bolushiche, yéqindin buyan chet ellerdiki xitaygha mahil bir qisim Uyghurlar ijtima'iy alaqe munberliridin ündidar, tik-tok, instigiram qatarliqlarda öz kimliki bilen otturigha chiqip, xitayni medhiyeleydighan teshwiqatlarni bashlighan.

Bu xil kishiler öz teshwiqatida bir tereptin xitay hökümtining Uyghurlargha qaratqan siyasitini medhiyelep: "Uyghurlar xitayda bextlik yashawatidu" dégen teshwiqatini qilsa, yene bir tereptin xitay dölitining birliki we xitay kompartiyesige bolghan sadaqitini ipadileydighan teshwiqat pa'aliyetliride bolghan.

Yéqinda tik-tok torida tarqalghan bir sin filimide, nöwette koriyede yashawatqan merdan isimlik bir hösün tüzesh doxturining koriyede tughulup emdila 7 yashqa kirgen qizini koriyediki xitay elchixanisi orunlashturghan "Xitay kompartyesining 100 yilliqini tebriklesh sen'et pa'aliyiti" ge qatnashturghanliqi hemde xitay kompartyesini medhileydighan qizil naxsha éytquzghanliqi ashkarilandi.

Koriyediki merdan we uning a'ilisi heqqide tarqalghan yene bashqa sin körünüshliride bu a'ilining koriyediki xitay elchixanisi orunlashturghan pa'aliyetlerge aktipliq bilen qatnishidighanliqi, xitay muxbirlirining ziyaritini qobul qilip, özlirining xitay dölitige bolghan sadaqitini ipadiligenliki körsitilgen. Bu sin filimlirida yene ularning koriyede tughulghan ikki qizini, xitayning "Jongxu'a birliki" we "Xitay kimliki" terbiyeside yétildürüp, ijtima'i alaqe munberliride qizlirining tili arqiliq "Xitayda Uyghurlar bextlik yashawatidu" dégen teshwiqatni élip bériwatqanliqi ashkarilandi.

Biz torda ashkarilan'ghan bu uchurlargha asasen nöwette koriyede yashawatqan merdan isimlik bu Uyghur doxturgha téléfon qilduq.

Emma u téléfonning amérikadiki erkin asiya radiyosining muxbiridin kelgenlikini bilgendin kéyin, özining herqandaq ziyaretni qobul qilalmaydighanliqini bildürüp, téléfonni üzüwetti.

Yéqinda tik-tokta tarqalghan yene bir sin filimide norwégiyede yashaydighan ekber isimlik bir Uyghurning xitayda ishlen'gen aptomobil we bashqa xitay mehsulatlirini medhiyelep, xitayche teshwiqatni bazargha salghanliqi, özi gerche chet elde yashawatqan bolsimu, emma özini her waqit "Xitay puqrasi" dep qaraydighanliqi körsitildi.

Uning bu qilmishi chet ellerdiki Uyghurlar teripidin ijtima'i alaqe munberliride qattiq eyibleshke uchrighandin kéyin, u yene féysbukta bayanat bérip, özini elwette "Sherqiy türkistanliq Uyghur" dep bilidighanliqi, emma wetende qalghan uruq-tughqanliri bilen alaqe éhtiyaji üchün xitay tilidiki tik-tok torida xitay hökümitini medhiyeleydighan sözlerni qilishqa mejbur bolghanliqini bildürgen we Uyghurlardin epu sorighan.

Halbuki, uning epu sorishigha qarita yézilghan inkaslarda bir qisim Uyghurlar uning ehwalini chüshinidighanliqini ipadiligen bolsimu, emma zor köpchilik Uyghurlar uning bu qilmishini "Xitaypereslik" we "Ikki yüzlimichilik" dep eyibligen, shundaqla uning bu qilmishini hergizmu qobul qilalmaydighanliqini bildürgen.

Uyghur kishilik hoquq qurulushi ning tetqiqatchisi zubeyre shemsidin xanim ziyaritimizni qobul qilip, chet ellerdiki az bir qisim Uyghurlarning özliri démokratik döletlerde yashap turuqluqmu, xitay dölitige bolghan sadaqitini ipadileshtek qilmishlirining ilgirimu körülüp kéliwatqan bir illet ikenlikini bildürdi.

Zubeyre xanim bu xil kishilerning körsetken bahanisi her xil bolsimu, emma ularning bu xil qilmishi yenila milllet menpe'etini sétish hisabigha özining shexsi menpe'etini qandurush ikenlikini tekitlidi.

Zubeyre xanim yene bu xil xitaygha sadaqetmen kishilerning chet ellerde xitaygha qarshi élip bériliwatqan naraziliq namayishlirigha qatnashmayla qalmastin, hetta gherb démokratik döletliridiki Uyghurlarning ehwalini xitay hökümitige yetküzüsh, xitaygha qarshi naraziliq pa'aliyetlirige ashkara tosqunluq qilish, Uyghur pa'aliyetchilirini qarilash qatarliq herketleride boluwatqanliqini bildürdi.

U yéqinda awstraliyediki xitay elchixanisi üchün ishleydighan xalide isimlik xitayperes Uyghur ayalning Uyghurlarning xitaygha qarshi naraziliq namayishlirini ashkara tosush herkitide bolghanliqini, gérmaniyede turuwatqan bir Uyghur qizning xitayning Uyghur siyasitini aqlap, lagér shahitlirining guwahliqlirini qarilighanliqini misal teriqiside körsitip ötti.

Zubeyre xanim xitay hökümiti bu xildiki kishilerni özlirige kérek bolghanda azghine menpe'et bérip ishletsimu, emma dölet ichide bir ömür xitaygha sadiq bolup ishligen Uyghurlarni tutqun qilip türmilerge solighinigha oxshashla, ulargha we ularning tughqanlirinighimu waqti kelgende haman qara qolini salidighanliqini agahlandurup ötti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet