Qeshqerde “Kespiy terbiyilesh” tin chiqqan tejribilik shopur erkin hashim hammalliq qilmaqta

Xitay axbarat organliri atalmish kespiy terbiyilesh merkezliride telim alghanlarning, yéngi kesiplerni ögen'genliki we emgek maharitining öskenliki, shundaqla yaxshi ish imkanlirigha ériship iqtisadiy kirimining yükselgenlikini xewer qilghan idi. Qeshqerge qarita élip barghan éniqlashlirimiz dawamida qeshqer paxteklide ilgiri musteqil yük toshush mulazimiti bilen shughullinip yaxshi turmush kechürüp kétiwatqan tejribilik shopur erkin hashimning lagérgha kirip-chiqqandin kéyin nöwette qeshqerdiki bir xitay yük toshush shirkitide hammalliq qiliwatqanliqi ashkarilandi.

Qeshqer weziyitidin xewerdar kishilerdin biri, qeshqer paxteklide olturushluq tejribilik shopur erkin hashimning 2017 ‏-yilning béshida lagérgha élip kétilip 2019 ‏-yili qoyup bérilgenliki, ilgiri yük toshush mashinisida sheherler ara qatnap, yeni öz aldigha yük toshush mulazimiti bilen shughullinip yaxshi pul tépiwatqan erkin hashimning lagérdin chiqqanda, pütün mal-mülkidin ayrilip bolghan bolghachqa, qeshqer shehiridiki bir yük toshush shirkitide hammalliq qiliwatqanliqini melum qildi. Déyilishiche erkin hashim lagérgha ekétilgendin kéyin uning ayali, anisi we ikki balisi bolup a'ilidiki 4 jan béqishsiz qalghan. Deslepki yili bu a'ile erkin hashimning saqlap qoyghan pullirini bilen kün ötküzgen bolsa, ikkinchi yiligha kelgende, a'ilining birdinbir kirim menbesi bolghan yük toshush mashinisini sétishqa mejbur bolghan. Shunga erkin hashim lagérdin chiqqandin kéyin iqtisadiy hayatta ishni nöldin bashlashqa toghra kelgen. Bu heqte élip barghan éniqlashlirimiz dawamida, paxteklidiki bir saqchi xadimi, erkin hashimning eslide bir shopur ikenliki, lagérgha ekétilishtin awwal ishlirining yaxshi yürüshüp kétiwatqan halette ikenlikini ashkarilidi. U yene erkin hashimning ikki yil lagérda yétip chiqqanliqini tilgha aldi.

Téléfonimizni qobul qilghan paxteklidiki bir kent kadiri erkin hashimning nöwette, qeshqer sheher ichidiki bir yük toshush shirkitide hammalliq qiliwatqanliqini delillidi.

Bu kadirning bayanliridin melum bolushiche, ilgiri hepte arilap ishleydighan, shenbe-yekshenbilerni a'ile ezaliri bilen birlikte dem élishta ötküzidighan erkin hashim nöwette heptisige 7 kün ishlimekte؛ ilgiri éyigha az dégende 5 ming yüen kirim qilidighan erkin hashim nöwette künige 10 sa'ettin ishlep éyigha 1300 yüen kirim qilmaqta.

Ilgiriki éniqlashlirimiz dawamida, lagérlar qurulghandin buyan qeshqer we xotenlerde Uyghurlarning qolidiki bir qisim tijaretlerning xitay köchmenlirige ongche qalghanliqi melum bolghan. Weziyettin xewerdar kishining inkasida erkin hashimning yük toshush mulazimiti bilen shughulliniwatqan mezgilide birqanche xitay köchmenni ish bilen teminligenliki, yeni hammal qilip ishletkenliki, emdilikte bolsa, özi ilgiri ishletken xitay köchmenlirining qolida ishlewatqanliqi yézilghanidi. Mezkur kent kadirimu erkin hashimning nöwette burun özi ishletken xitay köchmenlerning qolida ishlewatqanliqini delillidi.

Melum bolushiche, ilgiri mertliki we bezide betxejliki bilen tonulghan erkin hashim nöwette ish mezgilide xitay köchmenliri teminligen ikki quta teyyar chöp bilen ghizalanmaqta. Radiyomizgha kelgen inkasta erkin hashimning ishchan we mes'uliyetchan bir kishi ikenliki eskertilgen. Paxtekli saqchi xadimi, erkin hashimning qoyup bérilish sewebi heqqidiki so'alimizgha jawaben, uning yuqiriqi tereplirini inkar qilmasliq bilen birlikte, uning oyunchi teripimu barliqi, siyasiy we diniy pa'aliyetlerdin uzaq biri ikenlikini bayan qilish arqiliq, erkin hashimning ilgiri haraq-tamaka bilen hepileshken biri bolghanliqi üchünla qoyup bérilgenlikini isharetlidi.

Xitay da'iriliri ashpez-nawayliq, kiyim tikküchilik qatarliq en'eniwi hünerlerni we tordin mal sétiwélish qatarliq addiy meshghulatlarni ögitishni kesip ögitish dep teshwiq qilghanidi. Emeliyette buni öginiwatqanlar arisida shi'endiki bir uniwérsitétta qurulush inzhénériliqini oqughan rejepniyaz؛ shangxey sana'et uniwérsitétida oqughan inzhénér memet'imin we qeshqer medeniy yadikarliqlar idarisining tonushturghuchisi, tetqiqatchi ekber ebeydulla qatarliq aliy melumatliq we yuqiri téxnikiliq kesip ehliliriningmu barliqi ashkarilan'ghanidi.

Yuqirida tejribilik shopur erkin hashimning lagérda atalmish “Kesip öginip” chiqqandin kéyin hammalliq qiliwatqanliqi heqqide melumat berduq.