Xitayning teywen'ge tajawuz qilish meqsitide herbiy hazirliqlarni kéngeytiwatqanliqi ilgiri sürülmekte

“Jenubiy xitay seher géziti” ning herbiy közetküchi we bashqa menbelerdin neqil élip xewer qilishiche, xitay da'iriliri teywen'ge tajawuz qilish meqsitide sherqiy jenubiy déngiz rayonida herbiy hazirliqlarni kücheytmekte iken.

Xewerge qarighanda, béyjingdiki herbiy menbeler xitayning mezkur rayonlargha özining DF-17 tipliq awazdin tiz uchidighan bashqurulidighan bombilirini yötkigenlikini bildürgen. 

Mezkur bombilarning uchush musapisi 2 ming 500 kilométir etrapida bolup, belgilen'gen nishan'gha del tégish nisbitimu bir qeder yuqiri iken. 

Xitay herbiy da'iriliri mezkur bombilarni fujiyen we jéjyang qatarliq ölkilerge orunlashturghan. 

Melum bolushiche, xitay da'iriliri teywenning musteqilliqqa mayil sabiq prézidénti chén shüybyen hakimiyet sürgen dewrlerdimu fujiyen we jéjyang qatarliq ölkilerdiki bashqurulidighan bomba sanini köpeytken iken. 

Teywenning nöwettiki prézidénti sey yingwinmu chén shüybyen'ge oxshashla teywen “Démokratik we tereqqiyat partiyesi” din bolup, teywenni amérikagha ilgirikidinmu yéqinlashturghan we amérika bilen “Wetenperwer” tipliq bashqurulidighan bomba sistémisi, F-16 küreshchi ayropilanlarning ilgharlashturulghan radar sistémisi qatarliqlarni öz ichige alghan nurghun miqdardiki qoral-yaraq kélishimlirini imzalighan. 

Xewerde kanadadiki “Kanwa mudapi'e teqrizi” zhurnilining bash muherriri andréy changning éytqanliridin neqil élip körsitishiche, xitay yene özining gu'angdung we fujiyen ölkiliridiki déngiz armiye piyadiliri we rakéta qisimlirini kéngeytken. 

U mundaq dégen: “Sherqiy we jenubiy urush rayonidiki bashqurulidighan bomba bazilirining bezliri yéqinqi yillardin buyan bir hesse chongaytildi. Bu xelq azadliq armiyesining teywenni nishan qilghan urush teyyarliqini kücheytiwatqanliqini körsitidu.”

Uning bildürüshiche yene, xitay da'iriliri mezkur urush rayonigha rusiyedin import qilin'ghan S-400 tipliq hawa mudapi'e qalqan sistémisini sepligen.