Hamid kerzey xitay bilen köp tereplimilik kélishim tüzdi

Xitayni ziyaret qiliwatqan afghanistan prézidénti hamid kerzey düshenbe küni béyjingda xitay dölet re'isi xu jintaw bilen uchriship, xitay- afghanistan munasiwetlirini téximu kücheytish mesilisi üstide söhbet élip bardi.

Shinxu'a agéntliqining xewer qilishiche, uchrishish jeryanida xitay dölet re'isi xu jintaw afghanistan prézidénti hamid kerzeyge, xitay we afghanistan munasiwetlirining yéngi bir tereqqiyat basquchigha qedem qoyghanliqini bildürgen.

Ikki dölet rehbirining uchrishishidin kéyin, xitay we afghanistan otturisida birnechche kélishim imzalan'ghan bolsimu, emma kélishimlerning mahiyiti heqqide melumat bérilmidi.

Amérika birleshme agéntliqining bildürüshiche, xitay hökümiti ottura asiya rayonidiki néfit menbelirige érishish hemde Uyghur musteqilchilirining bu rayondiki pa'aliyetlirining aldini élish üchün, iqtisadiy yardem we meblegh sélish wediliri arqiliq rayon döletliri bilen munasiwetlirini kücheytmekte. Xewerde éytilishiche, xitay hökümiti Uyghur musteqilchilirining herikitini basturush meqsitide 2001 - yilidin burun yeni talibanlar hakimiyitining amérika herbiy qisimliri teripidin gumran qilinishidin burun, talibanlar hakimiyiti bilenmu yushurun alaqe qurghan.

Talibanlar hakimiyiti aghdurulghandin kéyin, afghanistan bilen xitay otturidiki iqtisadiy munasiwetler téz tereqqi qilghan bolup, tijaret hejmi 500 milyon dollargha yetken . Emma afghanistan prézidénti hamid kerzeyning bildürüshiche, bu sodining asasliq qisimi xitayning afghanistan'gha qilghan éksport malliridin teshkil tapidiken.

Kerzey, bu sepiri jeryanida Uyghur aptonum rayoninimu ziyaret qilip, aptonom rayon rehberliri bilen söhbet élip barmaqchi. (Qanat)