Хәлқара кәчүрүм тәшкилати хитайни кишилик һоқуқ паалийәтчилирини қоюп беришкә чақирди

Хәлқара кәчүрүм тәшкилати чаршәнбә күни хитай һөкүмитини икки йиғин ечилиштин бурун қолға елинған 10 нәччә нәпәр кишилик һоқуқ паалийәтчисини қоюп беришкә чақирди.

Хәлқара кәчүрүм тәшкилатиниң билдүрүшичә, хитай сақчилири икки йиғин ечилиштин тәхминән 2 һәптә авал бир қисим өктичи вә кишилик һоқуқ паалийәтчилирини қолға алған. Қолға елинғанларниң арисида әйдиз паалийәтчиси ху җя, компютер программа түзгүчи овяң шявроң вә өйлиридин мәҗбурий көчүрүветилгәнләрниң һоқуқи үчүн һәрикәт қилидиған бир қанчә паалийәтчи бар икән.

Бу кишиләрниң аилә-тавабатлириниң мәлум қилишичә, уларни сақчилар келип тутуп кәткән болуп, шундин буян уларниң из-дерики тепилмиған. Улар һәтта иккинчи айда елип берилған күч улап ачлиқ елан қилиш һәрикитигә қатнашқан икән. Шундақла һазирғичә һечқайси сақчи орунлири уларни тутуп туруватқанлиқини етирап қилмиған.

Хәлқара кәчүрүм тәшкилати баянатида, хитай һөкүмитиниң пуқраларниң кишилик һоқуқини қоғдаш йолида һәрикәт қилған бу паалийәтчиләрни қоюп беришини тәләп қилди. (Пәридә)